ارىپتەستەرىمەن جارىسقان: اسكەري قىزمەتكەر 17 جاستاعى قىزدى قاعىپ كەتتى
استانا. قازاقپارات - مارقۇم قىزدىڭ اپكەسى قىلمىستىق ءىس ءجۇرىپ جاتقانىمەن، ونىڭ كۇماندى تۇستارى كوپ ەكەنىن ءمالىم ەتتى.
سامارا - تاشكەنت اۆتوجولىندا قاتتى جىلدامدىقپەن كەلە جاتقان اسكەري قىزمەتكەر جاياۋ جۇرگىنشىلەر جولىنان ءوتىپ بارا جاتقان 17 جاستاعى قىزدى قاعىپ كەتكەن. اۋىر جاراقات سالدارىنان جاس ءوسپىرىم قىز اۋرۋحانادا قايتىس بولدى.
قايعىلى وقيعا 1-تامىزدا بولعان. مارقۇمنىڭ اپكەسى الەۋمەتتىك جەلىدەگى پاراقشاسىندا كولىك جۇرگىزۋشىسىنىڭ جازالانۋىن تالاپ ەتىپ، جازبا جاريالادى. مارقۇمنىڭ اپكەسىنىڭ ايتۋىنشا، قىز جاياۋ جۇرگىنشىلەر جولىنان وتپەك بولعان. ونى بايقاعان تراكتور توقتاپ، ەرەجە بويىنشا وعان جول بەرگەن. الايدا قىز تراكتوردىڭ ارتىندا كەلە جاتقان كولىكتى كورمەگەن. ال جۇرگىزۋشى تراكتوردىڭ توقتاپ تۇرعانىنا ءمان بەرمەستەن قاتتى جىلدامدىقپەن جاياۋ جۇرگىنشىنى قاعىپ وتكەن كورىنەدى.
«اۋرۋحاناعا جەتكەندە ول ەس-ءتۇسسىز بولدى. ءسىڭىلىم وزدىگىمەن دەم الا الماعاندىقتان، جانساقتاۋ بولىمىنە جاتقىزدى. ءبىراق دارىگەرلەر ونىڭ العان جاراقاتتارى اۋىر ەكەنىن جانە جاعدايى تىم ناشار ەكەنىن ايتتى. دارىگەرلەر 3 ساعات بويى اقبوتانى امان الىپ قالۋعا تىرىستى. ءبىز ودان ايىرىلىپ قالامىز دەپ ويلامادىق»، - دەپ جازدى جەلى قولدانۋشىسى.
سونداي-اق قىزدىڭ اپكەسى اۋرۋحانادا بولعان كەزدە بىردە ءبىر پوليتسيا قىزمەتكەرى كەلىپ، حاتتاما تولتىرماعانىن ايتتى. ەشكىم ولاردان جاۋاپ الماعان.
العاشىندا ول ءسىڭلىسىن قاعىپ كەتكەن اسكەري قىزمەتكەردىڭ جازالانباعانىن ايتىپ، شاعىمدانعان ەدى. مارقۇمنىڭ جاقىندارى جانتۇرشىگەرلىك جول اپاتى تۋرالى الەۋمەتتىك جەلىگە سالىپ، ماسەلەنى كوتەردى.
«3-تامىزعا دەيىن بىزگە ەشكىم حابارلاسپادى. قىلمىستىق ءىس قوزعالعان نە قوزعالماعانىن ءوزىمىز بارىپ بىلدىك. ءبىزدى م ا ي-عا جىبەردى، ولارعا قايتا پوليتسياعا بارۋىمىز كەرەگىن ايتتى. ال پوليتسياداعىلار بۇل ىسپەن اسكەري پوليتسيا اينالاستىنىن جەتكىزدى. نە ىستەرىمىزدى بىلمەدىك. ءوزىمىز ادۆوكات جالداپ، كىرىسكەندە قىلمىستىق ءىستىڭ قوزعالماعانىنان حاباردار بولدىق. زاڭ بۇلاي باياۋ قيمىلدايتىن بولسا، حالىق كومەكتەسەدى دەپ ويلادىق»، - دەلىنگەن جازبادا.
ايماقتىق قوعامدىق پاراقشالاردا قولدانۋشىلار اراسىندا شۋ شىققان سوڭ عانا، پوليتسەيلەر بۇل ءىستى تولىق قولعا العان. سەبەبى كۇدىكتى تەك 6-تامىزدا، ياعني قايعىلى وقيعادان كەيىن ءبىر اپتادان سوڭ ۇستالدى.
«تەرگەۋ سوتى كۇدىكتى تەمىر س. ت. سانكسيامەن قاماۋعا الدى»، - دەدى اقتوبە گارنيزونى اسكەري پوليتسيا باسقارماسى باستىعىنىڭ مىندەتىن اتقارۋشى تالعات احمەتوۆ.
سونداي-اق مارقۇم قىزدىڭ اپكەسى قىلمىستىق ءىس ءجۇرىپ جاتقانىمەن، ونىڭ كۇماندى تۇستارى كوپ ەكەنىن ءمالىم ەتتى.
«اناما نەگە ەكەنىن بەلگىسىز سۋديا حابارلاستى. ءبىراق زاڭ بويىنشا بۇلاي بولماۋ كەرەك. سونىمەن قاتار ساراپتاما وقيعا ورنىنان باستاپ قاتە جۇرگىزىلگەن. كەيىن ولار باسقا اۋرۋحانانى جانە قىزدىڭ دەنەسىندە تەك ءبىر جاراقات بولعانىن كورسەتكەن. وتىرىك كوپ، ولار وقيعانىڭ ورنىن جانە كولىكتىڭ ماركاسى مەن ءنومىرىن دە كورسەتپەگەن. كۇدىكتى ءوز كىناسىن مويىنداعان، ءبىراق ونىڭ ايتقانى شىندىققا جاناسپايدى. ول ءسىڭلىمنىڭ «جوق جەردەن اتىپ شىقتى» دەپ جازعان. وسىلايشا جازاسىن جەڭىلدەتۋگە تىرىسىپ جاتىر. ال ءبىز ادىلدىككە قول جەتكىزگىمىز كەلەدى، ءبىز قاراپايىم حالىقپىز، زاڭ بويىنشا بىزدىكى دۇرىس»، - دەيدى قىزدىڭ اپكەسى.
ول وسىلايشا ءىس سوتتالۋشىنىڭ پايداسىنا شەشىلۋى مۇمكىن دەپ قورقادى.
اراعا ۋاقىت سالىپ قايعىلى وقيعانى ءوز كوزىمەن كورگەن كۋاگەر دە تابىلدى. ونىڭ ايتۋىنشا، كۇدىككە ىلىنگەن اسكەري قىزمەتكەر ارىپتەستەرىمەن جارىسقان.
«مەن جولدا تۋىستارىممەن كەلە جاتقاندا الدىمىزدان ەكى كولىك ءوتتى. ءبىرى اق، ەكىنشىسى قارا. ولار جارىسىپ بارا جاتقانداي بولدى. اق كولىك العا قاراي وزىپ، جاياۋ جۇرگىنشىلەر جولىنان ءوتىپ كەتتى. سالدارىنان ول قىزدى قاعىپ كەتتى، ونىڭ سومكەسى قولىنان ۇشىپ كەتكەنىن كوردىم. كەيىن الەۋمەتتىك جەلىلەردە ول قىزدىڭ حيدجاب كيگەنى تۋرالى جازبانى كوردىم. ءبىراق ءبىز ءوتىپ بارا جاتقاندا قىزدىڭ باسىنداعى ورامالى ءتۇسىپ كەتكەن ەكەن. سوندىقتان مەن ونى بىردەن تانىمادىم. تەك سول سومكەنى كورگەندە عانا ەسىمە ءتۇستى. قاتتى سوققىدان كەيىن قىز ۇشىپ ءتۇستى. سونداي-اق ول جول اپاتىنان كەيىن ەكى كولىكتەن 8-گە جۋىق اسكەري كيىمدەگى ەر ادام شىققان. ولار قىزدىڭ تامىرى ۇستاپ كورىپ جاتتى.»، - دەيدى كۋاگەر.
