ارىستى شەگىرتكە باسىپ جاتىر
تۇركىستان. KAZINFORM- ارىس قالاسىنىڭ تۇرعىندارىن شەگىرتكە مەن شىركەي ابىگەرگە سالۋدا.
الەۋمەتتىك جەلىدە ارىستاعى ءۇي اۋلالارى مەن ەگىستىك القاپتارىن شەگىرتكە باسىپ قالعانى جايىندا ۆيدەولار تاراپ جاتىر. ءتىپتى، باقشاداعى جاندىكتەردىڭ كوپتىگىنەن اياق الىپ ءجۇرۋ مۇمكىن ەمەس ەكەنىن كورۋگە بولادى. ال، ديقاندار ەگىستىك القاپتارىنداعى ونىمدەرىن قورعاپ الەك. بۇل ءۇشىن وت جاعىپ، ءتۇتىن تۇتەتۋدە. زالالسىزداندىراتىن دارىلەر ساتىپ الىپ، شاشىپ جاتقاندار دا بار.
ارىس قالالىق اۋماقتىق ينسپەكتسياسى ۇسىنعان مالىمەتكە سۇيەنسەك، وڭىردە جوسپارلانعان 71300 گەكتار القاپ تولىعىمەن وڭدەلگەن. ونىڭ ىشىندە قوجاتوعاي، مونتايتاس اۋىلدىق وكرۋگىندەگى اۋماقتار بار.
«بيىلعى جىلدىڭ ەرەكشەلىگى، اتاپ ايتقاندا، ابيوتيكالىق فاكتورلارعا (تەمپەراتۋرا، ىلعالدىڭ مول ءتۇسۋى جانە ت. ب.) تىكەلەي بايلانىستى بولدى. تابيعي ءشوپتىڭ قالىڭ وسۋىنە بايلانىستى اسا قاۋىپتى ماروككو شەگىرتكەسىنىڭ دەرناسىلدەرى كورىنبەي قالدى. قازىرگى ۋاقىتتا اۋا تەمپەراتۋراسىنىڭ ىسۋىنا بايلانىستى، شوپتەر قۋراپ، كەي جەرلەرى ورىلىپ، شەگىرتكە ۇشقان كەزدە تارالۋىنا سەپتىگىن تيگىزۋدە. بۇگىنگى تاڭدا باسقا اۋدانداردان قوسىمشا تەحنيكالار تارتىلىپ، جۇمىستار توقتاۋسىز كۇندىز- ءتۇنى اتقارىلۋدا. وبلىس ورتالىعى مەن باسقا اۋدانداردان كەلگەن ماماندار دا قولدان كەلگەنشە كومەك كورسەتىپ جاتىر»، - دەلىنگەن ارىس قالالىق اۋماقتىق ينسپەكتسياسى ۇسىنعان اقپاراتتا.
ال، جەلىدەگى جازباعا پىكىر جازۋشىلاردىڭ كوپشىلىگى جۇمىستاردىڭ ساپاسىز جۇرگىزىلىپ جاتقانىن ايتۋدا. ولاردىڭ ىشىندە «شەگىرتكەدەن بۇرىن شىركەي تالاپ جاتىر. شەگىرتكە ادامعا تيىسپەيدى عوي»، «ارىس حالقى شىدامدى ەكەن، سابىر بەرسىن. اۋىلعا جەلمەن كەلگەن شىركەي ايەلىمدى شاققان ەدى بەتى ءىسىپ كەتتى»، «ەسىل ەڭبەك. ەگۋدىڭ ءوزى قانشاما جۇمىس»، «ساپاسىز ءدارى شاشىلعان»، «وبال- اي» سەكىلدى باسقا دا جازبالار بار.
