ارىستانبەك مۇحامەدي ۇلى تاعى قانداي قىلمىس جاساعانى ءۇشىن ايىپتالىپ جاتىر

استانادا بۇرىنعى مادەنيەت جانە سپورت ءمينيسترى ارىستانبەك مۇحامەدي ۇلىنا قاتىستى جاڭا ءىس اياسىندا باستى سوت وتىرىسى ءوتىپ جاتىر، دەپ حابارلايدى Kazinform.

سوتتا ەكى ەپيزود - «ديپلومات» قوناق ءۇيىن تارتىپ الۋ جانە «التىن ادام شەرۋى» كورمەسىن وتكىزۋ كەزىندەگى بيلىگىن اسىرا پايدالانۋ، رەيدەرلىك ارەكەت قارالىپ جاتىر.

پروكۋرور ولجاس حايرۋللايەۆتىڭ ايتۋىنشا، ارىستانبەك مۇحامەدي ۇلىنا قىلمىستىق كودەكستىڭ 28-بابى 3-بولىگى (قىلمىستى ۇيىمداستىرۋ) جانە 189-بابىنىڭ 4-بولىگىنىڭ 2-تارماعى (زاڭسىز يەلەنۋ نەمەسە تالان-تاراجعا سالۋ، ياعني سەنىپ تاپسىرىلعان بوتەننىڭ مۇلكىن اسا ءىرى كولەمدە جىمقىرۋ) بويىنشا ايىپ تاعىلعان.

ەكس-مينيستر سونداي-اق ق ك 361-بابى 4-بولىگىنىڭ 3-تارماعى (جاۋاپتى مەملەكەتتىك لاۋازىمدا وتىرعان تۇلعانىڭ اۋىر سالدارعا الىپ كەلگەن قىزمەتتىك وكىلەتتىگىن اسىرا پايدالانۋى)، 24-باپ 3- ءبولىم (قىلمىسقا وقتالۋ)، 249-باپ 1-بولىگى (رەيدەرلىك)، 250-بابىندا (وكىلەتتىگىن اسىرا پايدالانۋ) كوزدەلگەن قىلمىستى جاسادى دەگەن كۇدىككە ىلىنگەن.

ارىستانبەك مۇحامەدي ۇلىمەن بىرگە الماس نۇرازحان، اباي ساتىبالدين، لەونيد كوچەتوۆ، ازامات كوشەنوۆ، ايىم ءسادۋاقاسوۆا، گۇلزات جۋاسپايەۆا دا سوتتا جاۋاپ بەرىپ جاتىر.

بۇعان دەيىن حابارلانعانداي، 2019-جىلى Diplomat قوناق ءۇيىنىڭ يەسى ك. ەسىمدى كاسىپكەر ارىستانبەك مۇحامەدي ۇلىنا جۇگىنىپ، ماتەريالدىق كومەك سۇراعان.

مۇحامەدي ۇلى وعان 2,5 ميلليارد تەڭگە بەرۋگە كەلىسىپ، ونىڭ ورنىنا جاۋاپكەرشىلىگى شەكتەۋلى سەرىكتەستىكتىڭ 71 پايىز كاپيتالىن قايىن ەنەسىنىڭ اتىنا راسىمدەۋدى سۇراعان.

تەرگەۋ تاراپى ەكس-مينيستر سول كەزدە قوناق ءۇيدى ءوز بيلىگىنە الۋدى جوسپارلاعان دەگەن پايىم جاساپ وتىر.

مامىلە جاسالعاننان كەيىن ءبىراز ۋاقىت ءوتىپ، ا. مۇحامەدي ۇلى ك. ەسىمدى كاسىپكەردەن كاپيتالدىڭ قالعان 29 پايىزىن بەرۋىن تالاپ ەتكەن. تيىسىنشە ول باس تارتقان.

سودان كەيىن ايىپتالۋشى «ديپلومات» قىزمەتكەرلەرىنە ءوزىن وسى كەشەن يەسى رەتىندە كورسەتىپ، ولارعا ج ش س ديرەكتورىن قوناق ۇيگە كىرگىزبەۋدى تاپسىرعان.

ارتىنشا ا. مۇحامەدي ۇلى سەرىكتەستىك قاتىسۋشىلارىنىڭ جينالىسىن ۇيىمداستىرىپ، حاتتامانى قولدان جاساپ، ج ش س باسشىسى اتانادى.

ارىستانبەك مۇحامەدي ۇلى تاعىلعان ايىپپەن كەلىسپەدى.

ەسكە سالايىق، ۇلتتىق مۋزەيدىڭ بۇرىنعى ديرەكتورى ارىستانبەك مۇحامەدي ۇلى بىلتىر 28- مامىردا قاماۋعا الىنعان ەدى.

بيىلعى 20- ماۋسىمدا سوت ۇكىمىمەن ا. مۇحامەدي ۇلى 8 جىلعا باس بوستاندىعىنان ايىرىلدى.

سونىمەن قاتار ونىڭ سىبايلاستارى دا سوتتالدى.