پاريجدە نارازىلىق بىلدىرۋشىلەر «مونا ليزا» كارتيناسىنا سورپا قۇيدى

  پاريج. KAZINFORM - پاريجدە نارازىلىق بىلدىرۋشىلەر «مونا ليزا» كارتيناسىنا سورپا قۇيدى. تۋىندى وق وتكىزبەيتىن اينەكپەن جابىلعان، سوندىقتان زاقىمدانۋى ەكىتالاي، دەپ جازادى BBC.

باقىلاۋ كامەراسىنداعى ۆيدەودان ەكى ايەلدىڭ «ءبىزدىڭ اۋىل شارۋاشىلىعى جۇيەمىز اۋىرىپ جاتىر» دەگەن سوزبەن «پايدالى تاعامعا» قۇقىعىن تالاپ ەتكەنىن كورۋگە بولادى.

سوڭعى كۇندەرى فرانسيا استاناسىندا فەرمەرلەردىڭ نارازىلىق اكسياسى ءوتىپ جاتىر. جۇما كۇنى ولار پاريجگە اپاراتىن نەگىزگى جولداردى جاۋىپ تاستادى.

لەوناردو دا ۆينچيدىڭ XVI عاسىرداعى ەرەكشە قىلقالام پورترەتى - الەمدەگى ەڭ تانىمال ونەر تۋىندىسىنىڭ ءبىرى. كەسكىندەمە پاريجدەگى لۋۆردا ساقتاۋلى تۇر.

دجوكونداعا العاشقى قاستاندىق 1956 -جىلى فرانسيانىڭ وڭتۇستىگىندەگى مونتاۋبان قالاسىنىڭ مۇراجايىندا وتكەن كورمە كەزىندە جاسالدى.

كەلۋشىلەردىڭ ءبىرى كەنەپتىڭ تۇبىنە زاقىم كەلتىرىپ، سۋرەتكە كۇكىرت قىشقىلىن شاشىپ جىبەردى.

سول جىلى بوليۆيالىق ۋگو ۋنگازا ۆيللەگاس كارتيناعا تاس لاقتىرىپ جىبەردى، سودان بەرى دجوكوندانىڭ سول جاق شىنتاعىندا ارەڭ بايقالاتىن بەلگى بار.

كەي دەرەككوز كەيىنىرەك ۆيللەگاس مونا ليزانى انا رەتىندە جاقسى كورەتىنىن مويىنداعان، ءبىراق سودان كەيىن كەنەتتەن ونىڭ كۇلگەنىن بايقاپ، وعان اشۋى كەلگەن.

سودان بەرى سۋرەتتى وق وتكىزبەيتىن اينەكپەن جابۋ جونىندە شەشىم قابىلداندى.

1974 -جىلى كەسكىندەمەگە بوياۋ كوپىرشىگىن لاقتىرعان جاپون ءتۋريسى بۇل تۋرالى ءبىلدى مە، جوق پا جانە ونىڭ سەبەپتەرى قانداي ەكەنى بەلگىسىز، ءبىراق قورعانىس اينەگى سۋرەتتى قۇتقارىپ قالدى.

وسى جاعدايدان كەيىن «مونا ليزا» ودان دا تەرەڭىرەك جاسىرىلىپ، ارنايى جاسالعان گەليمەن تولتىرىلعان وق وتپەيتىن شىنى قوراپقا سالىندى.

الايدا، بۇل دجوكوندانى جەك كورۋشىلەرگە ونىڭ «ومىرىنە» قاستاندىق جاساۋعا ەش كەدەرگى ەمەس.

2009 -جىلدىڭ تامىزىندا بۇل جولى رەسەيلىك تۋريست «مونا ليزاعا» شىنىاياق لاقتىردى، ءبىراق اينەك تاعى قورعاپ قالدى، ال تۋريست پوليتسيا بولىمىنە جەتكىزىلدى (جانە كوپ ۇزاماي بوساتىلدى).

2019 -جىلى مۇراجاي كارتيناعا ودان دا ءمولدىر، وق وتكىزبەيتىن اينەك ورناتتى.

2022 -جىلى تاعى ءبىر مەيمان ادامداردى «پلانەتا تۋرالى ويلانۋعا» شاقىرىپ، سۋرەتكە تورت لاقتىردى.

1911-جىلى لۋۆردىڭ قىزمەتكەرى ۆينچەنتسو پەرۋدجيا مونا ليزانى ۇرلاۋ ءۇشىن تۇندە شكافتا جاسىرىنىپ قالعان ەدى.

كارتينا ەكى جىلدان كەيىن ونى فلورەنتسياداعى انتيكۆارياتقا ساتىپ جاتقان جەرىنەن تابىلدى.