پاريجدە 10 كۇننەن كەيىن باستالاتىن جازعى پاراليمپياداعا قازاقستاننان قانشا سپورتشى قاتىسادى
استانا. قازاقپارات - 2023-جىلى سپورت جانە دەنە شىنىقتىرۋمەن اينالىساتىن ەرەكشە قاجەتتىلىكتەرى بار ادامدار سانى 56822 ءنى قۇرادى.
بۇل تۋرالى بۇگىن ق ر تۋريزم جانە سپورت مينيسترلىگىنىڭ باسپا ءسوز قىزمەتىنەن ءمالىم بولدى.
مينيسترلىك تاراتقان دەرەكتەرگە قاراعاندا، 10 كۇننەن كەيىن پاريجدە XVII جازعى پاراليمپيادا باستالادى. بۇل جولى قازاقستان قۇراماسى رەكوردتىق جولداماعا يە بولدى.
«ءبىزدىڭ قۇراما سپورتتىڭ 9 تۇرىنەن (ءپاراجۇزۋ، پارا پاۋەرليفتينگ، پارا جەڭىل اتلەتيكا، پارا كانوەدە ەسۋ، پارا تاەكۆوندو، ۆولەيبولدى وتىرىپ ويناۋ - ەرلەر، پارا اتۋ، پارا ۇستەل تەننيسى، پارا دزيۋدو) 33 ليسەنزيا يەلەندى. جالپى 44 سپورتشى پاريجگە بارادى. ايتا كەتۋ كەرەك، كانوەدە ەسۋ (ايەل)، ۇستەل تەننيسى جانە ۆولەيبولدى وتىرىپ ويناۋدان العاش رەت ليسەنزيا جەڭىپ الدىق»، - دەلىنگەن حابارلامادا.
سونداي-اق استانادا الداعى 8-13-قىركۇيەكتە وسى جىلدىڭ ايتۋلى وقيعالارىنىڭ ءبىرى - دۇنيەجۇزىلىك كوشپەندىلەر ويىندارى وتەدى. ءدۇبىرلى دوداعا جالپى سانى 100 گە جۋىق مەملەكەتتىڭ دەلەگاتسياسى كەلەدى. 2500 مىڭنان استام سپورتشى باق سىنايدى. بۇگىنگى تاڭدا 89 ەل ناقتى قاتىساتىنىن رەسمي تۇردە راستادى. كوشپەندىلەر ويىندارىندا ۇلتتىق سپورتتىڭ 21 تۇرىنەن 97 مەدال جيىنتىعى ساراپقا سالىنادى.
