پاريج وليمپياداسىنىڭ جابىلۋ سالتاناتى ءوتتى
پاريج. KAZINFORM - فرانتسيا استاناسى پاريج قالاسىندا وتكەن جازعى وليمپيادا مارەسىنە جەتتى. ءدال ءقازىر سالتاناتتى جابىلۋ ءراسىمى اياقتالدى. حالىقارالىق وليمپيادا كوميتەتىنىڭ (ح و ك) پرەزيدەنتى توماس باح 2024 -جىلى پاريجدە وتكەن وليمپيادا ويىندارىن جابىق دەپ جاريالادى.
سودان كەيىن وليمپيادا الاۋى ءسوندىرىلدى.
«داستۇرگە سايكەس، مەن بۇكىل الەم جاستارىن ءتورت جىلدان كەيىن امەريكا قۇراما شتاتتارىنىڭ لوس-اندجەلەس قالاسىندا جينالىپ، بىزبەن بىرگە XXXIV وليمپيادا ويىندارىن اتاپ وتۋگە شاقىرامىن»، - دەدى توماس باح.
بۇل شارا حالىقارالىق شوۋ جۇلدىزدارىنىڭ ءان شاشۋىمەن باستالدى. «ستاد دە فرانس» ستاديونى ۇلكەن تەاترعا اينالدى. شوۋ اۋەدە التىن كوستيۋم كيگەن ادامنىڭ شاتىردان تۇسۋىمەن باستالدى، سودان كەيىن وعان وليمپيادا ويىندارىنىڭ وتانى گرەكيانىڭ تۋى تابىستالدى.
ايەلدەر اراسىنداعى مارافون جەڭىمپازدارى 2024 -جىلعى وليمپيادا ويىندارىنىڭ جابىلۋ سالتاناتىندا ماراپاتتالدى. پاريج وليمپياداسىندا قازاقستان قۇراماسى 1 التىن، 3 كۇمىس، 3 قولا مەدالعا قول جەتكىزدى.
قازاقستاندىق سپورتشىلار وليمپيادا ويىندارىندا سپورتتىڭ 25 تۇرىنەن سىنعا ءتۇستى. ەلىمىزدىڭ اتىنان 80 سپورتشى 92 جولداما جەڭىپ العان بولاتىن. قازاقستاندىق سپورتشىلار بوكس، دزيۋدو، سپورتتىق گيمناستيكا، جەڭىل اتلەتيكا، بايداركا مەن كانوەدە ەسۋ، وقپەن اتۋ، سەمسەرلەسۋ، گرەك- ريم كۇرەسى، ەركىن كۇرەس، ساداق اتۋ، ستەندتىك اتۋ، تەننيستەن سىنعا ءتۇستى.
سونداي-اق ولار ۆەلوشوسسە، ءجۇزۋ، زاماناۋي بەسسايىس، تاەكۆوندو، ۆەلوترەك، باتۋت گيمناستيكاسى، بادمينتون، اكادەميالىق ەسۋ، كوركەم گيمناستيكا، ترياتلون، ۇستەل تەننيسى، قۇزعا شىعۋ جانە برەيكينگتەن جارىس جولىنا شىقتى.
التىن جۇلدەنى وليمپيادانىڭ العاشقى كۇنى ەل قورجىنىنا دزيۋدودان ەلدوس سمەتوۆ (60 كەلى) سالدى. قازاقستاندىق بالۋان وسىلايشا ەل قۇراماسىنان وليمپيادادا ءۇش مارتە مەدال العان سپورتشى بولدى. ول 2016 -جىلى ريو وليمپياداسىندا كۇمىسكە قول جەتكىزسە، 2020 -جىلى توكيو وليمپياداسىندا قولا الدى.
ال كۇمىس جۇلدەنى سپورتتىق گيمناستيكادان ناريمان قۇربانوۆ، گرەك- ريم كۇرەسىنەن دەمەۋ جادىايەۆ (77 كەلى) جانە بوكستان نۇربەك ورالباي (80 كەلى) قورجىنعا سالدى.
سونداي-اق نىسانا كوزدەۋدەن كوماندالىق جارىستا يسلام ساتپايەۆ پەن الەكساندرا لە (تاپانشامەن 10 مەتردەن اتۋ)، دزيۋدودان عۇسمان قىرعىزبايەۆ (66 كەلى) جانە ايەلدەر بوكسىنان نازىم قىزايباي (51 كەلى) قولا مەدال جەڭىپ الدى.
قازاقستاندىق سپورتشىلار جازعى وليمپيادا ويىندارىنا 1996 -جىلدان بەرى تاۋەلسىز مەملەكەت قۇراماسى ساپىندا قاتىسۋعا مۇمكىندىك الدى. سودان بەرگى ۋاقىتتا ولار بارلىعى 78 مەدال الىپ قايتتى. ونىڭ ىشىندە 26-ى بىلعارى قولعاپ شەبەرلەرىنىڭ ەنشىسىنە تيەدى. قازاقستاندىق بوكسشىلار 7 التىن، 8 كۇمىس، 11 قولا مەدال الدى.
سالتاناتتى شارا وليمپيادا الاۋىن 2028 -جىلى كەلەسى ويىنداردى قابىلدايتىن لوس- اندجەلەس (اقش) قالاسىنىڭ مەرىنە تاپسىرۋمەن اياقتالدى.
اۆتور
ءادىلجان ۇمبەت
