پاريج وليمپياداسىنىڭ باستالۋىنا تۋرا 100 كۇن قالدى

استانا. KAZINFORM - بۇگىن فرانسيا تورىندە الاۋى تۇتاناتىن XXXIII جازعى وليمپيادا ويىندارىنىڭ باستالۋىنا تۋرا 100 كۇن قالدى. تورتكىل دۇنيە كوز تىككەن ءتورتجىلدىق دودا وسى جىلدىڭ 26-شىلدەسى مەن 11-تامىزى ارالىعىندا وتەدى.

وسىعان وراي بۇگىن ەلورداداعى «استانا» ترياتلون ساياباعىندا «وليمپيادا ويىندارىنا 100 كۇن» اتتى 5 شاقىرىم قاشىقتىقتا قالا تۇرعىندارى اراسىندا بۇقارالىق جۇگىرۋ شاراسى وتپەك.

ايتۋلى شاراعا 5 شاقىرىم قاشىقتىقتى باعىندىرا الاتىن بارلىق قالا تۇرعىندارى مەن قوناقتارى شاقىرىلادى. جاس شەكتەۋى جوق.

ۇيىمداستىرۋشىلاردىڭ ايتۋىنشا ايتۋلى بۇقارالىق جۇگىرۋ شاراسى وليمپيادالىق قوزعالىستى ناسيحاتتاۋ ءارى وليمپياداشالارىمىز بەن وليمپيادالىق ليتسەنزيالاردى الۋعا ۇمىتكەرلەرىمىزدى قولداۋ ماقساتىندا وتپەك.

«ماڭىزدى وقيعاعا دەيىن، XXXIII جازعى وليمپيادا ويىندارىنىڭ باستالۋىنا اعىمداعى جىلدىڭ 17-ساۋىرىندە 100 كۇن قالادى. سوعان وراي استانا قالاسى اكىمدىگىنىڭ قولداۋىمەن قالا تۇرعىندارى قاتىسا الاتىن بۇقارالىق شاراسىن وتكىزەمىز. ايتۋلى شارا بۇل جارىس ەمەستىگىن ايتا كەتكىم كەلەدى. بۇل بۇقارالىق جۇگىرۋ. وعان بارلىق تۇرعىندار قاتىسا الادى» - دەيدى استانا قالاسى اكىمدىگىنىڭ سپورتتىق بۇقارالىق ءىس- شارالاردى وتكىزۋ ديرەكسياسىنىڭ باسشىسى باحتيار ماسانوۆ.

تىركەلۋ كەزىندە قاتىسۋشىلارعا لوتەرەيا بيلەتتەرى تاراتىلىپ باعالى سىيلىقتار ويناتىلادى.
سونداي- اق، بۇگىن وسى شارا اياسىندا قول كۇرەس (ارمرەستلينگ)، ارقان تارتىس پەن گىر سپورتىنان جارىستار وتەدى.

ەستەرىڭىزگە سالا كەتەيىك، قازىرگى تاڭدا قازاقستان سپورتشىلارى پاريج وليمپياداسىنا 32 جولداما جەڭىپ الدى.

ناقتىراق ايتساق، وسىعان دەيىن قازاقستان قۇراماسى بوكستان (ەرلەر) - 6، نىسانا كوزدەۋ - 5، ساداق اتۋ - 4، سەمسەرلەسۋ - 4، تاس جولداعى ۆەلوسپورت - 3، قازىرگى بەسسايىس - 2، تاەكۆوندو - 2، بوكس (ايەلدەر) - 1، گرەك-ريم كۇرەسى - 1، ەركىن كۇرەس - 1، سپورتتىق گيمناستيكادان - 1، باتۋتتاعى گيمناستيكا - 1، جەڭىل اتلەتيكادان 1 جولداما جەڭىپ الدى.

جالپى پاريجدەگى وليمپيادا ويىندارىندا 32 سپورت تۇرىنەن 329 مەدال جيىنتىعى ساراپقا سالىنادى.

اۆتور
كۇنسۇلتان وتارباي