پاريج وليمپياداسىندا جۇلدە العان وتاندىق سپورتشىلاردىڭ قالتاسىنا قانشا اقشا تۇسەدى

 استانا. KAZINFORM - پاريج وليمپياداسىنىڭ باستالۋىنا از ۋاقىت قالدى. كۇنى كەشە گرەكيانىڭ وليمپيا قالاسىندا 2024 -جىلى پاريجدە وتەتىن وليمپيادا ويىندارىنىڭ الاۋى رەسمي تۇردە تۇتاندى.

بۇل رەتتە، ءدۇبىرلى دودادا جۇلدە العان قازاقستاندىق سپورتشىلاردى قانداي سىياقى كۇتىپ تۇر؟

ق ر تۋريزم جانە سپورت مينيسترلىگى باسپا ءسوز قىزمەتىنىڭ اگەنتتىك تىلشىسىنە بەرگەن جاۋابىندا سىياقى مولشەرى الدىڭعى وليمپياداداعى ىنتالاندىرۋمەن سالىستىرعاندا وزگەرىسسىز قالعان. ينفلياتسيا ەسەپكە الىنىپ، جۇلدە قورى ارتا تۇسە مە دەپ ويلاپ ەدىك.

- «حالىقارالىق سپورتتىق جارىستاردىڭ چەمپيوندارى مەن جۇلدەگەرلەرىنە، جاتتىقتىرۋشىلارعا جانە سپورت تۇرلەرى بويىنشا قر قۇراما كوماندالارىنىڭ (سپورت تۇرلەرى بويىنشا ۇلتتىق قۇراما كوماندالاردىڭ) مۇشەلەرىنە اقشالاي كوتەرمەلەۋدىڭ مولشەرىن بەكىتۋ تۋرالى» ق ر مادەنيەت جانە سپورت ءمينيسترىنىڭ 2023 -جىلعى 27 - ماۋسىمداعى №156 بۇيرىعىنىڭ نەگىزىندە وليمپيادا ويىندارىنىڭ چەمپيوندارى مەن جۇلدەگەرلەرىنە جانە ولاردىڭ جاتتىقتىرۋشىلارىنا اقشالاي كوتەرمەلەۋ كوزدەلگەن، - دەلىنگەن مينيسترلىكتىڭ رەسمي جاۋابىندا.

سونىمەن، سىياقى مولشەرى قانداي؟

1-ورىن: 250000 ا ق ش دوللار؛

2-ورىن: 150000 ا ق ش دوللار؛

3-ورىن: 75000 ا ق ش دوللار؛

4-ورىن: 30000 ا ق ش دوللار؛

5-ورىن: 10000 ا ق ش دوللار؛

6-ورىن: 5000 ا ق ش دوللار.

ايتا كەتەيىك، سپورتشىلاردىڭ جاتتىقتىرۋشىلارى دا ءدال وسىنداي مولشەردە سىياقى الادى.