پاريج وليمپياداسى: ورتالىق سپورت كلۋبىنىڭ سپورتشىلارى 20 وليمپيادالىق ليتسەنزيا ۇتىپ الدى

Париж олимпиадасы
Фото: Қорғаныс министрлігінің баспасөз қызметі

استانا. KAZINFORM - قورعانىس مينيسترلىگى ورتالىق سپورت كلۋبىنىڭ ساڭلاقتارى بايراقتى دودادا سپورتتىڭ ون ءتۇرى بويىنشا باسەكەگە تۇسەدى.

اتاپ ايتقاندا سپورتشىلار ەل جانە اسكەر نامىسىن بوكستان، دزيۋدودان، اتۋدان، بادمينتوننان، ەسكەك ەسۋدەن، سپورتتىق گيمناستيكادان، كۇرەستەن، سپورتتىق الپينيزمنەن، تحەكۆوندو جانە زاماناۋي بەسسايىستان قورعايتىن بولادى.

بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.

وليمپيادادا بوكستان لەيتەنانت ساكەن بيبوسىنوۆ، مەرزىمدى قىزمەتتەگى قاتارداعى جاۋىنگەر مۇحامەدسابىر بازارباي ۇلى جانە قارۋلى كۇشتەردىڭ قىزمەتشىسى ماحمۇد سابىرحان، گرەك-ريم كۇرەسىنەن كىشى سەرجانت ايدوس سۇلتانعالي، قاتارداعى جاۋىنگەر ءالىمحان سىزدىقوۆ، قارۋلى كۇشتەردىڭ قىزمەتشىلەرى دەمەۋ جابرايەۆ پەن نۇرسۇلتان تۇرسىنوۆ، سپورتتىق گيمناستيكادان – ق ك قىزمەتشىلەرى ناريمان قۇربانوۆ، زاماناۋي بەسسايىستان – ق ك قىزمەتشىسى ەلەنا پوتاپەنكو، وق اتۋدان - كىشى سەرجانت اسەم ورىنباي جانە ق ك قىزمەتشىسى يسلام ساتبايەۆ، تاەكۆوندودان – ق ك قىزمەتشىلەرى سوميرحون اباباكيروۆ جانە باتىرحان تولەۋعالي، سپورتتىق الپينيزم بويىنشا – ق ك قىزمەتشىسى ءامىر مايمۇراتوۆ، بادمينتوننان – ق ك قىزمەتشىسى دميتري پانارين، دزيۋدودان - اعا لەيتەنانت عۇسمان قىرعىزبايەۆ، قاتارداعى جاۋىنگەرلەر دانيار شامشايەۆ، ابىلايحان جۇبانازار جانە ق ك قىزمەتشىسى كاميلا بەرلىقاش، بايداركا ەسۋدەن – ق ك قىزمەتشىسى سەرگەي توكارنيتسكي جارىستاردا باقتارىن سىنايدى. 2016-جىلى ريو-دە-جانەيرو وليمپياداسىنا اسكەر سپورتشىلارى 8 ليتسەنزيا السا، 2021-جىلى توكيودا – 18، ال 2024-جىلى پاريجگە - 20 ليتسەنزيا جەڭىپ الدى.

- اسكەر سپورتشىلارى ىرىكتەۋ جارىستارىندا بارىنشا جاقسى ناتيجە كورسەتتى. دايىندىق دەڭگەيلەرىنىڭ باسەكەلى بولعانىن العان ليتسەنزيالار راستايدى. پاريجدەگى وليمپيادادا ۇزدىك تانىلۋ ءۇشىن مىقتى ناتيجەلەر كورسەتەدى دەپ سەنەمىز، - دەدى قورعانىس مينيسترلىگى سپورت كوميتەتىنىڭ ءتوراعاسى پولكوۆنيك ارمان ابەۋوۆ.

بۇگىنگى تاڭدا ق ر قورعانىس مينيسترلىگىنىڭ سپورت كوميتەتى - ورتالىق سپورت كلۋبىندا 20 عا جۋىق سپورت ءتۇرى كەڭ دامىپ كەلەدى. 180 نەن اسا ارميالىق ساڭلاق ءتۇرلى سپورتتان ۇلتتىق قۇرامانىڭ مۇشەلەرى. 2024-جىلدىڭ باسىنان بەرى ارميا قورجىنىندا 204 مەدال بار: ونىڭ - 91 ءى التىن، 2^ ءسى كۇمىس جانە 61 ءى قولا.

سوڭعى جاڭالىقتار