پاريج وليمپياداسى: قازاقستان دەلەگاتسياسى كوك تۋدى جەلبىرەتتى
استانا. KAZINFORM - فرانسيا استاناسى پاريج قالاسىندا جالاۋىن جاققان جازعى وليمپيادا ويىندارىنىڭ سالتاناتتى اشىلۋ راسىمىندە داستۇرگە ساي سپورتشىلار شەرۋى ءوتتى. قازاقستان قۇراماسىنىڭ تۋىن اسلانبەك شىمبەرگەنوۆ پەن ولگا سافرونوۆا ۇستاپ شىقتى.
شەرۋدىڭ ەرەكشەلىگى سول، دەلەگاتسيالار سەنا وزەنىن قايىقپەن ءجۇزىپ ءوتتى. سپورتشىلاردى تاسىمالداۋ ءۇشىن 80 قايىق جۇمىلدىرىلعانىن اتاپ وتكەن ءجون.
پاريج وليمپياداسىنا جولداما العان 80 سپورتشىنىڭ بارلىعى شەرۋدە توبە كورسەتكەن جوق. سەبەبى كەيبىر جەكەلەگەن سپورت تۇرلەرى جارىس كەستەسىنە سايكەس كەيىنىرەك باستالاتىندىقتان پاريجگە كەشىگىپ باراتىن سپورتشىلارىمىز بار.
26-شىلدەگە دەيىن فرانسيا استاناسىنا تەك اكادەميالىق ەسكەك ەسۋ، ساداق اتۋ، بوكس، نىسانا كوزدەۋ، تەننيس، ۇستەل تەننيسى، سپورتتىق گيمناستيكا، سەمسەرلەسۋ، ءجۇزۋ، بادمينتون، دزيۋدو، تاس جولداعى ۆەلوسپورت جانە ستەند اتۋ سپورتىنان ونەر كورسەتەتىن سپورتشىلارىمىز عانا بارىپ ۇلگەردى. ال ولاردىڭ سانى 50 سپورتشى عانا.
جەڭىل اتلەتيكادان قاتىساتىن وتانداستارىمىز 29-شىلدە كۇنى فرانسياعا اتتانادى. الايدا ولگا سافرونوۆا سالتاناتتى شەرۋدە تۋ ۇستايتىندىقتان، وزگەلەردەن بىرنەشە كۇن ەرتە باردى.
ال ەركىن كۇرەس شەبەرلەرى تەك 5-تامىزدا عانا الماتىدان اتتانسا، برەيكينگتەن سىنعا تۇسەتىن امير زاكيروۆ 8-تامىزدا پاريجگە جەتەدى.
قايىقپەن ءجۇزىپ وتكەن ءار ەلدىڭ دەلەگاتسياسىنا قاراپ، سپورتشىلاردىڭ از-كوپتىگىن شامالاۋعا بولاتىنى بەلگىلى. وسى رەتتە، پاريج وليمپياداسىندا ا ق ش-تىڭ سپورتشىلارى (592) كوپ ەكەنىن اتاپ وتكەن ءجون.
ال، ەكىنشى ورىن جارىس قوجايىندارىنىڭ ەنشىسىندە. فرانسيا 587 سپورتشىسىنا ءۇمىت ارتىپ وتىر. ءۇشىنشى ورىنعا اۋستراليا قۇراماسى (468) جايعاسقان. قازاقستان نامىسىن 80 سپورتشى قورعايتىنى بەلگىلى.
ەستەرىڭىزگە سالساق، بۇعان دەيىن الماتىدا قازاقستان قۇراماسىن فرانسيا استاناسى پاريج قالاسىندا وتەتىن XXXIII جازعى وليمپياداعا شىعارىپ سالۋ ءراسىمى وتكەن ەدى.
اۆتور
ورالحان قوجانوۆ
