پاريج مەرى وليمپيادا الدىندا سەنادا ءجۇزۋدى جوسپارلاپ وتىر

استانا. قازاقپارات - 17 -شىلدە كۇنى پاريج قالاسىنىڭ مەرى انن يدالگو وليمپيادا باستالاردان توعىز كۇن بۇرىن سەنا وزەنىندەگى سۋدىڭ ساپاسىن ءوزى تەكسەرمەكشى.

Le Figaro باسىلىمى انن يدالگو سەنا وزەنىنە 17-شىلدە سارسەنبى كۇنى تاڭەرتەڭ تۇسەتىنىن حابارلادى.

سونىمەن قاتار پاريج مەرى سپورت فەدەراتسيالارىنىڭ بىرىمەن، سونىڭ ىشىندە اشىق سۋدا ءجۇزۋ فەدەراتسياسىنىڭ ليتسەنزياسىنا يە جۇزۋشىلەرگە قوسىلۋدى ۇسىندى. الايدا قالالىق اكىمدىك بۇل ءىس-شارا «ءجۇزۋ ءۇشىن لاستانۋ شەگىنەن اسىپ كەتكەن جاعدايدا كەيىنگە قالدىرىلۋى مۇمكىن» دەپ ەسكەرتتى.

باستاپقىدا پاريج مەرى سەناعا ءتۇسۋدى 23-ماۋسىمعا جوسپارلادى. الايدا ماۋسىمداعى قولايسىز اۋا رايى وزەننىڭ باكتەريولوگيالىق لاستانۋىنا اسەر ەتتى. سونىمەن قاتار ۇلتتىق اسسامبلەيانىڭ كەزەكتەن تىس سايلاۋىنا بايلانىستى وليمپياداعا دەيىنگى سيمۆولدىق ءساتتى كەيىنگە قالدىرۋعا تۋرا كەلدى.

سەنا وزەنىنىڭ تازالىق دەڭگەيى ماۋسىم ايىنىڭ سوڭىندا جاقسارىپ، وزەندە جوسپارلانعان وليمپيادالىق ءىس-شارالاردان ءتورت اپتا بۇرىن ءجۇزۋ ستاندارتتارىنا ساي بولعانى حابارلاندى.

وليمپيادانىڭ اشىلۋ سالتاناتىنان كەيىن 26-شىلدە كۇنى سەنادا ترياتلوننان (30-جانە 31-شىلدە، 5-تامىز)، ءجۇزۋ مارافونىنان (8-جانە 9-تامىز) جانە پاراترياتلوننان ( 1-جانە 2-قىركۇيەك) جارىس ءوتۋى كەرەك. الايدا قاتتى جاۋىن-شاشىن بولعان جاعدايدا، تازارتىلماعان سۋ - جاڭبىر مەن اعىندى سۋلاردىڭ قوسپاسى وزەنگە اعىزىلۋى مۇمكىن. ول ءۇشىن بيلىك ويىن الدىندا ارنايى تىرەك قۇرىلعى ورناتقان.