پاريجدە دۇكەن يەلەرى جاپپاي تارتىپسىزدىكتەن قورعانۋعا كىرىستى

17-18-قازاندا ءومىر ءسۇرۋ قۇنىنىڭ وسۋىنە قارسى كاسىپوداقتاردىڭ جالپىۇلتتىق نارازىلىق اكتسياسى كەزىندە جاپپاي تارتىپسىزدىك بولدى. وسى وقيعالاردان كەيىن كوپ كاسىپكەر، اسىرەسە شاعىن بيزنەس يەلەرى، ەندى پوليتسيانىڭ كومەگىنە سەنبەيتىنىن مالىمدەدى.
جەرگىلىكتى باق مالىمەتىنشە، سول كەزدە پاريجدە 450 گە جۋىق دۇكەنگە زالال كەلگەن، ونىڭ 228 ى تونالعان. ەل بويىنشا كەمىندە 3 مىڭ كاسىپكەرلىك نىسانعا زيان كەلگەن.
قازىر فرانسيا استاناسىنداعى قارۋ-جاراق دۇكەندەرىندە ساۋدا كولەمى كۇرت وسكەن. پاريجدەگى ەڭ كونە قارۋ-جاراق دۇكەندەرىنىڭ ءبىرى Armurerie de la Bourse يەسى ءارى ۇلتتىق قارۋ-جاراق ساتۋشىلار پالاتاسىنىڭ پرەزيدەنتى يۆ گوللەتتيدىڭ ايتۋىنشا، ءوزىن-ءوزى قورعايتىن قۇرالدار 10 ەسە كوپ ساتىلا باستاعان.
سۇرانىسقا يە تاۋارلاردىڭ قاتارىندا كوزدەن جاس اعىزاتىن گاز جانە بۇرىشتى گەل قۇيىلعان باللوندار، ەلەكترلى شوكەرلەر، شوقپارلار مەن رەزەڭكە وق اتاتىن تاپانشالار بار. سوڭعىسى D ساناتىنا جاتادى جانە كامەلەتكە تولعان ازاماتتارعا ارنايى رۇقساتسىز ساتىلادى. وسىنداي جاعداي ليون، ليلل جانە مارسەل قالالارىندا دا بايقالادى.
كەيبىر دۇكەن يەلەرى تۇندە دە ساۋدا ورىندارىندا قالۋدى جوسپارلاپ وتىر. باسقالارى ۆيترينالارىن فانەر قالقاندارمەن جاۋىپ، كۇزەت يتتەرى بار جەكە كۇزەت قىزمەتتەرىن جالداپ جاتىر. پاريج پوليتسياسىنىڭ پرەفەكتىسى پاتريس فور كاسىپكەرلەرگە جولداعان حاتىندا قاۋىپسىزدىك شارالارىن كۇشەيتۋگە، جۇمىس ۋاقىتىن وزگەرتۋگە جانە جەكە كۇزەت قىزمەتتەرىن تارتۋ مۇمكىندىگىن قاراستىرۋعا كەڭەس بەردى.
بيلىك سەنبى كۇنى قۇقىق قورعاۋ كۇشتەرىن اۋقىمدى تۇردە جۇمىلدىرۋعا دايىندالىپ جاتىر. ولاردىڭ قاتارىندا «سەنتينەل» وپەراتسياسىنا قاتىساتىن اسكەري قىزمەتشىلەر مەن دەمالىستان شاقىرىلعان CRS ارنايى بولىمشەسىنىڭ قىزمەتكەرلەرى بار. ليوندى قوسا العاندا، بىرنەشە قالادا نارازىلىققا شىعۋعا تىيىم سالىندى. پاريجدىڭ كەيبىر اۋداندارىندا كومەندانتتىق ساعات ءالى دە كۇشىندە.

Medef جۇمىس بەرۋشىلەر بىرلەستىگىنىڭ باسشىسى پاتريك مارتەن كاسىپكەرلەردى قاۋىپسىزدىكتى ءوز قولدارىنا الماۋعا جانە قۇقىق قورعاۋ ورگاندارىنا سەنۋگە ۇندەدى. الايدا ساۋالناماعا قاتىسقان فرانسۋزداردىڭ ەداۋىر بولىگى «ءوز قاۋىپسىزدىگىمىزدى ءوزىمىز قورعاۋعا ءماجبۇرمىز» دەپ ەسەپتەيدى.
ەسكە سالايىق، الدىڭعى دەمالىس كۇندەرى فرانسيادا بولعان جاپپاي تارتىپسىزدىكتەر ساقتاندىرۋ تولەمدەرىنىڭ مولشەرى جاعىنان ەلدەگى ەڭ ءىرى وقيعالاردىڭ ءبىرى ەكەنىن جازعانبىز.

قارجى ساراپشىلارىنىڭ باعالاۋىنشا، ساقتاندىرىلعان شىعىن كولەمى 1,2 ميلليارد ەۋروعا جەتۋى مۇمكىن. Financial Times ساۋالناما جۇرگىزگەن بروكەرلەر دە شىعىن 1 ميلليارد ەۋرودان اساتىنىن بولجايدى. بۇل كورسەتكىش 2023 -جىلدىڭ جازىندا بولعان تارتىپسىزدىكتەردەن كەلگەن 700-800 ميلليون ەۋرو شىعىننان اسىپ ءتۇستى.