پاريج-2024: وليمپيادانىڭ اشىلۋ سالتاناتىنا قانشا سپورتشىمىز قاتىسادى

استانا. KAZINFORM - فرانسيا استاناسى پاريج قالاسىندا وتەتىن XXXIII جازعى وليمپيادا ويىندارىىڭ سالتاناتتى اشىلۋ راسىمىنە قازاقستان قۇراماسىنان قانشا سپورتشى قاتىساتىنى بەلگىلى بولدى.

ق ر سپورتتى دامىتۋ ديرەكسياسىنىڭ باسپا ءسوز قىزمەتى ءمالىم ەتكەندەي، وليمپيادا ويىندارىنا قاتىساتىن 80 سپورتشىمىزدىڭ بارلىعى 26-شىلدە كۇنى وتەتىن اشىلۋ سالتاناتىنا بارا المايدى.

وعان سەبەپ، كەيبىر جەكەلەگەن سپورت تۇرلەرى جارىس كەستەسىنە سايكەس كەيىنىرەك باستالاتىندىقتان پاريجگە دە كەشىگىپ باراتىن سپورتشىلارىمىز بار. سول سەبەپتى بارلىعى اتالعان سالتاناتتى شاراعا قاتىسا المايدى.

26-شىلدەگە دەيىن فرانسيا استاناسىنا تەك اكادەميالىق ەسكەك ەسۋ، ساداق اتۋ، بوكس، نىسانا كوزدەۋ، تەننيس، ۇستەل تەننيسى، سپورتتىق گيمناستيكا، سەمسەرلەسۋ، ءجۇزۋ، بادمينتون، دزيۋدو، تاس جولداعى ۆەلوسپورت جانە ستەند اتۋ سپورتىنان ونەر كورسەتەتىن سپورتشىلارىمىز عانا بارىپ ۇلگەرەدى. ال ونىڭ سانى 50 سپورتشىنى عانا قۇرايدى.

جەڭىل اتلەتيكادان قاتىساتىن وتانداستارىمىز 29-شىلدە كۇنى فرانسياعا اتتانادى. الايدا ولگا سافرونوۆا سالتاناتتى شەرۋدە تۋ ۇستايتىندىقتان، وزگەلەردەن بىرنەشە كۇن ەرتە بارادى.

ال، ەركىن كۇرەس شەبەرلەرى تەك 5-تامىزدا عانا الماتىدان اتتانسا، برەيكينگتەن سىنعا تۇسەتىن امير زاكيروۆ 8-تامىزدا پاريجگە جەتەدى.

كەرى باعىتتا ەلىمىزگە ءبىرىنشى بولىپ، 4-تامىز كۇنى اكادەميالىق ەسكەك ەسۋ مەن دزيۋدوداعى سپورتشىلارىمىز ورالادى.

ەستەرىڭىزگە سالا كەتەيىك، فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىندا وتەدى. ويىندارعا الەمنىڭ 205 ەلىنەن 10500 سپورتشى قاتىسادى دەپ جوسپارلانعان. وندا 32 سپورت تۇرىنەن 329 مەدال جيىنتىعى ساراپقا سالىنادى.

اۆتور
كۇنسۇلتان وتارباي