پاريج-2024: قاي ەلدىڭ سپورتشىلارى قانداي سىياقى الادى؟

استانا. KAZINFORM - پاريج وليمپياداسىنا دا ساناۋلى ۋاقىت قالدى. بۇل كۇندەرى ءتورتجىلدىقتىڭ باس دوداسىنا باراتىن سپورتشىلار انىقتالىپ تا ۇلگەرگەن. ال جەڭىمپازدارعا ءار مەملەكەت ءارتۇرلى ماراپات تاعايىنداپ وتىر.

قاي ەلدىڭ قانداي سىياقى بەرەتىنى ازىرگە بەلگىسىز. دەگەنمەن، بۇعان دەيىنگى وليمپيادادان قاتتى ايىرماشىلىق بولا قويماس. ەگەر ءبارى سول كۇيى قالسا، وندا سىياقى جاعىنان كوش باسىندا سينگاپۋر، يندونەزيا، گونكونگ جانە يزرايل تۇرادى.

ەڭ كوپ سىياقىنى سينگاپۋر دايىنداپ وتىر. وليمپيادا التىنىن العان سپورتشىعا 737 مىڭ دوللار تاعايىندالسا، كۇمىس مەدال ءۇشىن - 369 مىڭ، قولا مەدال ءۇشىن 184 مىڭ دوللار بەرىلەدى. توكيو وليمپياداسىندا سينگاپۋرلىق سپورتشىلار ءبىر دە ءبىر مەدال ەنشىلەي الماعان ەدى.

تايۆان ەكىنشى ساتىدا تۇر: جەڭىمپازعا 719 مىڭ دوللار بەرىلەدى. ەكىنشى جانە ءۇشىنشى ورىن العاندار تيىسىنشە 252 جانە 180 مىڭ دوللاردان الادى.

سىياقى تاعايىنداۋ جاعىنان ۇزدىك ۇشتىكتى گونكونگ تۇيىندەگەن. جوعارى سۇرىپتى مەدال ەنشىلەگەن سپورتشى 644 مىڭ دوللارعا يەلىك ەتەدى. كۇمىس جۇلدەگەر - 322 مىڭ، قولا جۇلدەگەر 161 مىڭ دوللار الادى.

يزرايل اتلەتتەرى ءتورت مىڭ دوللارعا كەم الادى - 640 مىڭ دوللار. كۇمىس جۇلدەگەر - 210 مىڭ، قولا جۇلدەگەر 130 مىڭدى قانجىعاسىنا باسادى.

بەسىنشى ورىندا تۇركيا تۇر: التىن ءۇشىن - 380 مىڭ دوللار، كۇمىس ءۇشىن - 230 جانە قولا ءۇشىن - 115 مىڭ دوللار. يندونەزيالىق سپورتشىلار اراسىندا ۇزدىك شىققاندار 346 مىڭ دوللاردى ەنشىلەسە، كۇمىس جانە قولا مەدالگە تيىسىنشە 138400 جانە 69200 دوللاردان بەرىلەدى.

قازاقستاندا سوڭعى 16 جىلدا وليمپيادا جۇلدەگەرلەرى ءۇشىن تاعايىندالاتىن سىياقى مولشەرى وزگەرگەن ەمەس. 2008-جىلى بەيجىڭ وليمپياداسىنىڭ قارساڭىندا ۇكىمەت جەڭىمپازدارعا 250 مىڭ دوللاردان، كۇمىس جانە قولا جۇلدەگەرلەرگە تيىسىنشە 150 جانە 75 مىڭ دوللاردان بەرۋ تۋرالى قاۋلى شىعارعان. بۇل كورسەتكىش جاعىنان ەلىمىز 7-ورىندا تۇر.

ال، الامان وتەتىن فرانسيادا چەمپيون 76 مىڭ دوللار السا، كۇمىس مەدال يەسىن 29 مىڭ، قولا جۇلدەگەردى 17500 دوللار سىياقى كۇتىپ تۇر.