اگروونەركاسىپتەگى وزگەرىستەر: سيفرلىق تەحنولوگيادان اقىلدى فەرماعا دەيىن

ۇنەم 1 ميلليارد تەڭگە

اۋىل شارۋاشىلىعى مينيسترلىگىنىڭ مالىمەتىنشە، ۆەدومستۆونىڭ 80 مەملەكەتتىك قىزمەتىنىڭ 75 ى، ياعني 94 پايىزى ەلەكتروندى فورماتتا كورسەتىلەدى. كەلەسى كەزەڭنىڭ ماقساتى - سيفرلىق قىزمەتتەر سانىن ارتتىرۋمەن قاتار، ولاردىڭ ۇيلەسىمدى جۇمىسىن قامتاماسىز ەتۋ جانە قولدا بار مەملەكەتتىك دەرەكتەردى قايتا پايدالانۋ.

مەملەكەتتىك قولداۋدىڭ نەگىزگى قۇرالدارىنىڭ ءبىرى - Gosagro.kz اقپاراتتىق جۇيەسى. ول ارقىلى 20 باعىت بويىنشا قولداۋ ەلەكتروندى تۇردە راسىمدەلەدى. جۇيەدە 200 مىڭعا جۋىق پايدالانۋشى تىركەلگەن. مەملەكەتتىك پلاتفورماعا كوشۋ اقىلى ءوتىنىم بەرۋ قىزمەتىنەن باس تارتۋعا مۇمكىندىك بەرىپ، ۆەدومستۆو دەرەكتەرىنە سايكەس اۋىل شارۋاشىلىعى وندىرۋشىلەرىنە 1 ميلليارد تەڭگەدەن استام قاراجات ۇنەمدەۋگە جول اشتى. ەلەكتروندى كەزەك، كۇتۋ پاراعى جانە فورماتتى- لوگيكالىق باقىلاۋ پروتسەستىڭ اشىقتىعىن ارتتىرىپ، قاتەلىكتەر مەن نەگىزسىز شەشىمدەر ءقاۋپىن تومەندەتەدى.

دەگەنمەن اۆتوماتتاندىرۋ بارلىق تاۋەكەلدى وزدىگىنەن جويمايدى. ونىڭ تيىمدىلىگى باستاپقى دەرەكتەردىڭ ساپاسىنا، قولداۋ كورسەتۋ ەرەجەلەرىنىڭ تۇسىنىكتىلىگىنە جانە ءوتىنىم بەرۋدەن باستاپ قاراجات اۋدارۋعا دەيىنگى باقىلاۋعا بايلانىستى.

39,6 ميلليون مال باسى ەسەپكە الىندى

اۋىل شارۋاشىلىعى جانۋارلارىن سايكەستەندىرۋ اقپاراتتىق جۇيەسىندە ءىرى جانە ۇساق قارا مال مەن جىلقىلاردى قوسا العاندا شامامەن 39,6 ميلليون مال باسى ەسەپكە الىنعان. جەكە سايكەستەندىرۋ جانۋار تۋرالى مالىمەتتەردى ۆەتەريناريالىق ءىس-شارالارمەن جانە ورىن اۋىستىرۋلارمەن بايلانىستىرىپ، قاداعالاۋعا نەگىز بولادى.

Tort Tulik موبيلدى قولدانباسى سالا قاتىسۋشىلارىنىڭ سيفرلىق سەرۆيستەرگە قولجەتىمدىلىگىن كەڭەيتسە، ۆەتەريناريالىق ماماندارعا ارنالعان ج ي-اسسيستەنت دامىتىلىپ جاتىر. الايدا، بۇل شەشىمدەردىڭ تيىمدىلىگى دەرەكتەردىڭ ۋاقتىلى ەنگىزىلۋىنە جانە جەرگىلىكتى جەردە ءبىرىڭعاي ەسەپ جۇرگىزۋ ەرەجەلەرىنىڭ ساقتالۋىنا بايلانىستى.

سالانىڭ ءارتۇرلى سەگمەنتىندە، ونىڭ ىشىندە eFish جۇيەسىندە سيفرلىق شەشىمدەر قولدانىلىپ كەلەدى. تۇپكى ماقسات - ءوزارا بايلانىسسىز سەرۆيستەر جيىنتىعى ەمەس، ءونىم قوزعالىسىن ەسەپكە الۋ مەن باقىلاۋدىڭ ءبىرىڭعاي ءارى ۇيلەسىمدى تەتىگىن قالىپتاستىرۋ.

پايدالانىلمايتىن القاپتاردى انىقتاۋ

جەردى پايدالانۋدى باقىلاۋدا JerInSpectr جۇيەسى جەردى قاشىقتان زوندتاۋ دەرەكتەرىن پايدالانىپ، قوسىمشا تەكسەرۋدى قاجەت ەتەتىن ۋچاسكەلەردى انىقتايدى. 2025 -جىلدىڭ قورىتىندىسىندا 22,2 مىڭ گەكتار پايدالانىلمايتىن ەگىستىك جانە شامامەن 916 مىڭ گەكتار جۇكتەمەسى تومەن جايىلىم انىقتالدى. ەلدىڭ اۋىل شارۋاشىلىعى القاپتارىن سيفرلاندىرۋ اياقتالدى.

سپۋتنيكتىك دەرەكتەر ىقتيمال بۇزۋشىلىقتاردى انىقتاۋعا كومەكتەسەدى. دەگەنمەن تۇپكىلىكتى باسقارۋشىلىق شەشىم تەكسەرۋ ناتيجەلەرى مەن جەرگىلىكتى جاعدايدى ەسكەرە وتىرىپ قابىلدانۋى ءتيىس.

وسىمدىك شارۋاشىلىعى ءونىمىنىڭ قاداعالانۋ اقپاراتتىق جۇيەسى (ءو ش ق ج) دامىپ كەلەدى. ونى ازىرلەۋ جۇمىستارىن اياقتاۋ 2027 -جىلدىڭ سوڭىنا جوسپارلانعان. جۇيە وسىمدىك شارۋاشىلىعى ءونىمىنىڭ قوزعالىسى تۋرالى دەرەكتەردى سيفرلىق ينفراقۇرىلىمعا ەنگىزىپ، وندىرىستەن باستاپ ودان ءارى اينالىمعا دەيىنگى پروتسەستەردىڭ تۇتاس كورىنىسىن قالىپتاستىرۋعا ىقپال ەتۋى ءتيىس.

دەرەكتەر ءبىر جەردە توعىسادى

اگروونەركاسىپ كەشەنىن سيفرلاندىرۋدىڭ كەلەسى كەزەڭى - بىتىراڭقى اقپاراتتىق جۇيەلەردەن ءوزارا بايلانىستى دەرەكتەر نەگىزىندە باسقارۋعا كوشۋ. وسى ماقساتتا Digital Agro Platform جانە Smart Data Agro سالالىق دەرەكتەر كولى بويىنشا جۇمىس جۇرگىزىلىپ جاتىر. ولار مەملەكەتتىك اقپاراتتىق جۇيەلەردەگى مالىمەتتەردى بىرىكتىرىپ، BI-دى قوسا العاندا، اناليتيكالىق قۇرالداردى قامتاماسىز ەتۋى ءتيىس.

نىسانالى ناتيجە - اگروونەركاسىپ كەشەنىنىڭ ءبىرىڭعاي سيفرلىق تەرەزەسى مەن فەرمەردىڭ سيفرلىق پروفيلىن قالىپتاستىرۋ. بۇل قاجەتتى مالىمەتتەر مەن قىزمەتتەرگە ءبىر دەرەكتى قايتا ۇسىنباي-اق قول جەتكىزۋگە مۇمكىندىك بەرەدى.

ول ءۇشىن جۇيەلەردى تەحنيكالىق تۇرعىدان بىرىكتىرۋمەن قاتار، انىقتامالىقتار مەن دەرەكتەر فورماتتارىن ۇيلەستىرۋ، ولاردىڭ ساپاسىنا جاۋاپكەرشىلىكتى ايقىنداۋ، ۆەدومستۆوارالىق الماسۋدى جولعا قويۋ جانە قايتالاناتىن قول وپەراتسيالارىن قىسقارتۋ قاجەت.

سمارت-فەرمالار: تەحنولوگيادان ناقتى ناتيجەگە

سمارت- فەرمالاردا دەرەكتەر ەسەپ بەرۋ ءۇشىن عانا ەمەس، ءوندىرىستى كۇندەلىكتى باسقارۋ ءۇشىن دە پايدالانىلادى. ءدال ەگىنشىلىك تەحنولوگيالارى، توپىراق ىلعالدىلىعى مەن جاعدايىن ولشەيتىن داتچيكتەر، مەتەوستانتسيالار، سپۋتنيكتىك سۋرەتتەر مەن ۇشقىشسىز اپپاراتتار ەگىس پەن القاپتاردىڭ جاي-كۇيىن باعالاۋعا كومەكتەسەدى.

مال شارۋاشىلىعىندا تولىق روبوتتاندىرىلعان ءسۇت- تاۋار كەشەندەرى، وتار قوزعالىسىن قاداعالاۋ جۇيەلەرى جانە جانۋارلاردىڭ دەنساۋلىعىن باقىلايتىن قۇرالدار قولدانىلادى. جاساندى ينتەللەكت وسى مالىمەتتەر ارقىلى ونىمدىلىك پەن اۋا رايى تاۋەكەلدەرىن بولجاۋعا، مال جايۋدى باسقارۋعا مۇمكىندىك بەرەدى.

الايدا سمارت- فەرما جاي عانا داتچيكتەر جيىنتىعى نەمەسە ارنايى تەحنيكا ساتىپ الۋ ەمەس. ناتيجە دەرەكتەردىڭ جۇيەلى جينالۋىنا، سيفرلىق قۇرالداردىڭ وندىرىستىك پروتسەستەرمەن بايلانىسىنا جانە اناليتيكانى ءىس جۇزىندە قولدانۋعا تاۋەلدى.

سوندىقتان شارۋاشىلىقتاردىڭ سيفرلىق كەمەلدىگىن باعالاۋ، سمارت- فەرمالارعا جاتقىزۋدىڭ تۇسىنىكتى ولشەمشارتتارىن ازىرلەۋ جانە ءتيىستى ءتىزىلىم قالىپتاستىرۋ ماڭىزدى. شارۋاشىلىق دەڭگەيىندە جينالعان دەرەكتەر سالىستىرمالىلىق، دايەكتىلىك جانە قولجەتىمدىلىك تالاپتارى ساقتالعان جاعدايدا سالالىق اناليتيكادا دا پايدالانىلۋى ءتيىس.

سيفرلىق ترانسفورماتسيا وزدىگىنەن ەمەس، ولشەنەتىن ناتيجەگە اكەلگەندە عانا ءماندى. فەرمەر ءۇشىن بۇل قولجەتىمدى ءارى تۇسىنىكتى قىزمەتتەر، مەملەكەت ءۇشىن پروتسەستەردىڭ اشىقتىعى مەن باسقارىلۋى، سالا ءۇشىن «دەرەكتەر - بولجام - شەشىم - ناتيجە» قاعيداتى بويىنشا قابىلداناتىن شەشىمدەر. ءدال وسىنداي مودەلگە كوشۋ سيفرلىق تەحنولوگيالاردى جەكەلەگەن قۇرالدار جيىنتىعى رەتىندە ەمەس، قازاقستان اۋىل شارۋاشىلىعىن زاماناۋي باسقارۋدىڭ نەگىزى رەتىندە پايدالانۋعا مۇمكىندىك بەرەدى.

بۇعان دەيىن قازاقستاندىق ستۋدەنت اۋىل شارۋاشىلىعى رەسۋرستارىن ءتيىمدى پايدالانۋعا ارنالعان ج ي شەشىمىن ۇسىنعانىن جازعان ەدىك.