«ارتىما نازاربايەۆتىڭ نوكەرلەرى ءتۇستى». ەكس-دەپۋتات مۇستافا وزتۇرىكپەن قارىم-قاتىناسى تۋرالى ايتتى

پارلامەنت ءماجىلىسىنىڭ بۇرىنعى دەپۋتاتى سەرىك ءابدىراحمانوۆ مۇستافا وزتۇرىكپەن قارىم-قاتىناسى تۋرالى «قاسقا جول» باعدارلاماسىندا ايتتى.

ول مۇستافا وزتۇرىكتى الماتىعا شاقىرعانىن اتاپ ءوتتى.

«زامانبەكتىڭ قاسىنا ورىنباسارلىققا كەلگەننەن كەيىن ميۋنحەندەگى جارىسقا باردىم. سول كەزدە مۇستافانى تاۋىپ الىپ، كەزدەستىم. ءسويتىپ، قازاقستانعا الدىرتۋ تۋرالى ويىمدا زامانبەككە ايتقان ەدىم. بىردەن كەلىستى. ءبارىن ۇيىمداستىردىق. جانىمدا ءجۇردى. ۇيىمدە بولدى، بالاسى مەن اناسى كەلدى. ىنىمدەي كوردىم. مۇستافانىڭ ساياساتقا ارالاسقىسى كەلدى. وتە ساۋاتتى جىگىت. بىرنەشە تىلدە سويلەدى. جانىنداعى دوستارى اسەر ەتتى ما، ول دا مەنەن الىستادى. 1994-جىلى ءوزى بەل بۋىپ، جوعارى كەڭەستە سايلاۋعا ءتۇستى. بيلىك قىسىم جاساپ، ونى سايلاۋدان الدىرىپ تاستادى»، - دەدى ول.

كەيىن ول مۇستافانى كورمەگەنىن ايتتى.

«ارتىما نازاربايەۆتىڭ نوكەرلەرى ءتۇستى. سول ۋاقىتتا قيىن كەزەڭ بولدى. مەنى قينامايىن دەدى مە، مۇستافا مەنىمەن ارالاسپاي كەتتى. ونىڭ سايلاۋعا تۇسكەنىن دە كەيىن ءبىلدىم. 1995-جىلى 15-20 دەپۋتات ۇندەۋ جاساپ، نارازىلىق جاساپ جاتقان ەدى. سوندا الپىس دەگەن ءىنىم «اعا، مۇستافا كەتىپ قالدى» دەپ حاباردى ەستىرتتى. بىردەن ۇيىنە بارسام، حاليفا التاي اتامىز وتىر ەكەن. اۋرۋحاناعا تۇسكەنىن دە ماعان ايتپاپتى. ول كەزدە مەنىڭ ارتىمنان تىنتۋشىلەر، شايقاس كوپ بولدى. «حالىق جاۋى» بولۋعا ۇمىتكەر بولدىم. ءسويتىپ، حاليفا التايمەن اقىلداسىپ، ءجون-جورالعىسىنىڭ ءبارىن شەشتىك»، - دەدى سەرىك ءابدىراحمانوۆ.