بۇگىن الماتى قالاسىنىڭ قۇرمەتتى ازاماتى اتانعاندار كىمدەر

الماتى تۇرعىندارى مەن قوناقتارى قالا كۇنىن اتاپ ءوتىپ جاتىر. بۇل كۇن قىركۇيەكتىڭ ءۇشىنشى جەكسەنبىسىنە بەلگىلەنگەن. ءداستۇر بويىنشا ءتۇرلى ءىس- شارالار ۇيىمداستىرىلدى، دەپ حابارلايدى قازاقپارات ءتىلشىسى.

مەرەكە اباي الاڭىنداعى «الماتى جۇرەگىمدە» حالىقارالىق بايقاۋىنان باستالدى، وندا شاھار باسشىسى ەربولات دوسايەۆ الماتىلىقتاردى قالا كۇنىمەن قۇتتىقتادى.

«الماتى - قازاقستان تاۋەلسىزدىگىنىڭ التىن بەسىگى، ەلىمىزدىڭ جاڭا تاريحى باستالعان قالا. ءبىزدىڭ قالامىزدىڭ باستى قۇندىلىعى - سىزدەر، الماتى تۇرعىندارى. سىزدەر قالانى كوركەيتىپ، الۋان ءتۇرلى جانە قوناقجاي ەتەسىز. وسى ەرەكشە كۇنى مەگاپوليستىڭ دامۋىنا ۇلەسىن قوسقان ءار الماتىلىققا العىس بىلدىرەمىن»، - دەدى اكىم.

قالا باسشىسى الماتىنىڭ دامۋىنا، وركەندەۋىنە ۇلەس قوسقان 10 تۇرعىندى «الماتى قالاسىنىڭ قۇرمەتتى ازاماتى» اتاعىمەن ماراپاتتادى. ولاردىڭ قاتارىنا عالىم، دارىگەر، سۋرەتشى، قوعام قايراتكەرلەرى بار. اتاپ ايتقاندا:

- «دوس- مۇقاسان» اتى اڭىزعا اينالعان ۆوكالدى- اسپاپتى ءانسامبلى، ماراپاتتى مۇرات قۇسايىنوۆ قابىلداپ الدى؛

- ورازاق يسماعۇلوۆ - كورنەكتى انتروپولوگ عالىم؛

- الپىسباي قازعۇلوۆ - بەلگىلى سۋرەتشى، «قازاقستان سۋرەتشىلەر وداعى» ر ق ب مۇشەسى؛

- ءجانيا اۋباكىروۆا - قازاقستاننىڭ حالىق ءارتىسى؛

- مۇرات ابدۋشۋكۋروۆ - قوعام قايراتكەرى، «اۋعانستانداعى سوعىس ارداگەرلەرى مەن مۇگەدەكتەرى قوعامدىق بىرلەستىكتەرىنىڭ ۇيلەستىرۋ كەڭەسى» ق ب ءتوراعاسى؛

- ءسات توقپاقبايەۆ - مەملەكەت جانە ساياسي قايراتكەر؛

- عاحيپ ۋاليەۆ – ق ر ۇ ع ا اكادەميگى؛

- اسقار جۇمادىلدايەۆ - عالىم- ماتەماتيك، ق ر ۇ ع ا اكادەميگى؛

- قۇرالبەك وردابايەۆ – ق ر ەڭبەك سىڭىرگەن جاتتىقتىرۋشىسى، سپورت ارداگەرى، فۋتبولشى؛

- زاۋرەش امانجولوۆا - اكۋشەرلىك، گينەكولوگيا جانە پەريناتولوگيا عىلىمي ورتالىعى» ا ق ديرەكتورلار كەڭەسىنىڭ ءتورايىمى.

ءىس- شارانىڭ رەسمي بولىگى اياقتالعاننان كەيىن تۇڭعىش پرەزيدەنت ساياباعىندا «Alma Fest» فەستيۆالى ءوتتى. مۇندا «ءشوپ ديىرمەنى» تاقىرىپتىق قوندىرعىسى ورناتىلدى. الما جارمەڭكەسىنە 45 شارۋاشىلىق 125 توننا جەمىس اكەلدى، وندا مەرەكەنىڭ ءار قوناعى وزىنە ۇناعان الما سورتىنىڭ ءدامىن تاتىپ كوردى. قالا تۇرعىندارى مەن قوناقتارى ءۇشىن فۋد- كورتتار، فوتوايماقتار، بالالار بولمەسى، سپورت جانە اشىق كينو كورۋگە ارنالعان الاڭدار ۇيىمداستارىلعان.

ال، ارباتتا «Artbat Fest» زاماناۋي ونەر فەستيۆالى ءوتتى. ەرەكشە ونەر نىساندارىنىڭ ارقاسىندا اۋماق ناعىز اشىق گالەرەياعا اينالدى. سونداي- اق، پانفيلوۆ كوشەسىندە «تۋعان كۇنىڭمەن، الماتى!» فەستيۆالى اياسىندا كوپتەگەن تاقىرىپتىق الاڭدار ۇيىمداستىرىلدى.