كاسپي بانككە شابۋىل جاساعان كۇدىكتى ءى ءى م باسشىسىمەن قالاي كەلىسسوز جۇرگىزگەنىن ايتتى
ايىپتى تەرگەۋ كەزىندە بانك بولىمشەسىنە شابۋىل جاساۋدى 17- ماۋسىمدا جوسپارلاپ، عيماراتقا كەلگەنىن ايتتى. دەگەنمەن ول اياق استىنان ويىنان باس تارتقان. ءسويتىپ 18- ماۋسىم كۇنى قايتا كەلگەن.
«بانكتىڭ ەڭ جاقىن بولىمشەسىن 2 گيس ارقىلى تاپتىم. كۇتپەگەن جەردەن بانككە بارعىم كەلدى. مەن Kaspi Bank- ءتىڭ وسى فيليالىنا بارۋدى جوسپارلادىم. ۇيالى تەلەفونىمنىڭ قۋاتى ءبىتىپ، جاقىن ماڭداعى دۇكەنگە باردىم، سودان سوڭ بانك بولىمشەسىنە باردىم. ول جەردە ادام كوپ بولدى، سوندىقتان ەشكىم زارداپ شەكپەسىن دەپ ويىمنان باس تارتتىم»، - دەدى ءاليحان مۋرادوۆ سوت بارىسىندا. سونداي-اق، سوتتالۋشى بانك عيماراتىنا شابۋىل جاساعان كەزدە ەسىرتكى قابىلداماعانىن، ءبىراق سىرا ىشكەنىن ايتتى. «كاسپي بانك اكتيۆتەرىنىڭ ءبىر بولىگىن قايىرىمدىلىق قورى شوتتارىنا اۋدارۋدى سۇرادىم. بانككە شابۋىل جاساۋدان بىرنەشە كۇنى بۇرىن دوسىمنىڭ قىزى قايتىس بولدى. ماعان بىرەۋىن ۇستاپ تۇرۋ جەتكىلىكتى دەپ ويلادىم»، - دەيدى ول.
ودان بولەك، تەرگەۋشى ءا. مۋرادوۆتان ىشكى ىستەر ءمينيسترى جۇرگىزگەن كەلىسسوز تۋرالى سۇرادى.
«مەن ونىڭ مينيستر ەكەنىن بىلمەدىم. كەپىلگە العان قىزدان ينتەرنەتتەن ونىڭ كىم ەكەنىن قاراپ بەرۋدى سۇرادىم، سودان كەيىن عانا كىم ەكەنىن ءتۇسىندىم. سوسىن مينيستر ءوزىن تانىستىرىپ، ءوز-وزىمە كەلۋىمدى سۇرادى. سونىمەن قاتار كەپىلگە العان ازاماتتاردى بوساتسام، ولاردىڭ ورنىنا ءوزى قالاتىنىن ايتتى. مەندە ءمينيستردى كەپىلگە الۋ تۋرالى وي بولعان ەمەس. مينيستر كەلگەننەن كەيىن ءىستىڭ ناسىرعا شاپقانىن ءتۇسىندىم»، - دەگەن جاۋاپ قاتتى ايىپتى.
سوت وتىرىسى جالعاسىپ جاتىر.
ەسكە سالا كەتسەك، بيىل 18- ماۋسىمدا قارۋلانعان ەر ادام ەلورداداعى Kaspi بانك عيماراتىندا بىرنەشە كىسىنى تۇتقىندا ۇستاپ وتىردى.
اراعا ۋاقىت سالىپ اتالعان بانكتىڭ باسپا ءسوز قىزمەتى عيماراتتا كليەنتتەردىڭ جوقتىعىن جانە پوليتسيا قىزمەتكەرلەرىنىڭ كۇدىكتىمەن كەلىسسوز جۇرگىزىپ جاتقانىن مالىمدەدى.
وقيعا ورنىنا ىشكى ىستەر ءمينيسترى مارات احمەتجانوۆ باردى.
پوليتسيا قىزمەتكەرلەرى كەپىلدەگى ازاماتتاردى بوساتىپ الدى.
23- تامىزدا Kaspi Bank عيماراتىنا جاسالعان شابۋىل بويىنشا قىلمىستىق ءىس سوتقا جەتكەنىن حابارلاعان ەدىك.
ايتا كەتسەك، 29- تامىزدا وتكەن العاشقى سوت وتىرىسىندا Kaspi Bank عيماراتىن باسىپ العان جىگىت ونىڭ الدىندا ءوزىن ءولتىرۋ ءۇشىن ءدارى ىشكەنى بەلگىلى بولدى.
ودان بولەك، Kaspi بانك قىزمەتكەرى عيماراتقا شابۋىلداۋ وقيعاسىن باستان-اياق ايتىپ بەرگەن ەدى.
