قازاقستاندا جەراستى سۋىنىڭ قورى قانشا

گەولوگيا كوميتەتىنىڭ ءتوراعاسى ەرلان اقباروۆ قازاقستان گەولوگتەرىنىڭ تۇڭعىش سەزىنەن كەيىن ب ا ق وكىلدەرىنە بەرگەن سۇحباتىندا ەلدەگى جەراستى سۋىنىڭ قورى قانشا ەكەنىن ايتتى، دەپ حابارلايدى قازاقپارات ءتىلشىسى.

«بىزدە جەراستى سۋىنىڭ 43 ميلليارد تەكشە مەتر قورى تىركەلگەن. ونىڭ ءبارى - تۇشى سۋ. بۇل قوردىڭ 45 پايىزى وڭتۇستىك وڭىرلەردە جاتىر. وڭتۇستىك وڭىرلەردىڭ جەراستى سۋىمەن قامتاماسىز ەتىلۋى جاقسى. وزدەرىڭىز بىلەسىزدەر، مىناۋ باتىس وڭىرلەردە ءبىراز ماسەلە بار. قازىر ەندى جاڭادان مينيسترلىك قۇرىلدى عوي، گيدروگەولوگيالىق قىزمەت قۇرىلادى دەگەن جوسپار بار. بۇل ماسەلەگە دە زور ءمان بەرىلەدى دەگەن ءسوز»، - دەدى كوميتەت باسشىسى.

ەرلان اقباروۆ جەراستى سۋلارىن زەرتتەۋ قىزمەتى سۋ رەسۋرستارى مينيسترلىگىنە ءوتۋى مۇمكىن ەكەنىن ايتادى.

«ازىرگە جەراستى سۋىن زەرتتەۋ، ونىڭ قورىن قاداعالاۋ ءبىزدىڭ قۇزىرىمىزدا. سۋ رەسۋرستارى مينيسترلىگى گيدروگەولوگيالىق قىزمەت قۇراتىن بولسا، اتالعان مىندەتتەردىڭ ءبارى، ياعني ءبىزدىڭ ءبىرقاتار فۋنكتسيامىز سول ۆەدومستۆوعا ءوتۋى مۇمكىن»، - دەدى گەولوگيا كوميتەتىنىڭ ءتوراعاسى.