ديكي ارمان ءىسى: زارداپ شەگۋشىلەر ومىرلەرىنە قاتەر تونگەنىن مالىمدەدى
«الماتى قالالىق قىلمىستىق ىستەر جونىندەگى مامانداندىرىلعان اۋدانارالىق سوتى ا. جۇماگەلديەۆ پەن وزگە دە سوتتالۋشىلاردىڭ ءىسى بويىنشا الدىن الا تىڭداۋدى قايتا باستادى. ءبىرقاتار زارداپ شەگۋشىدەن، كەيبىر سوتتالۋشىلار مەن ولاردىڭ ادۆوكاتتارىنان، سونىمەن قاتار كۋاگەرلەردەن پروتسەستى جابىق رەجيمدە وتكىزۋ تۋرالى ءوتىنىش ءتۇستى. ولار ومىرلەرىنە، وتباسىلارى مەن جاقىندارىنىڭ قاۋىپسىزدىگىنە قاتەر ءتونىپ تۇرعانىن مالىمدەدى. سونىمەن قاتار سوت سوتتالۋشى مەن ادۆوكاتتىڭ پروكۋرورلارعا قارسىلىق ءبىلدىرۋ تۋرالى ءوتىنىشىن قابىلدامادى»، - دەلىنگەن الماتى سوتتارىنىڭ Facebook پاراقشاسىندا جاريالانعان اقپاراتتا.
سوتتالۋشىلاردىڭ قاتارىندا 45 ادام بار. ولارعا ق ر قىلمىستىق كودەكسىنىڭ 362 (بيلىكتى نەمەسە وكىلەتتىكتى اسىرا پايدالانۋ)، 262 (قىلمىستىق توپتى، قىلمىستىق ۇيىمدى قۇرۋ جانە باسشىلىق جاساۋ، وعان قاتىسۋ)، 272 (جاپپاي تارتىپسىزدىك)، 191 (توناۋ)، 126 (زاڭسىز باس بوستاندىعىنان ايىرۋ) 268-باپتارى (بانديتيمز) بويىنشا ايىپ تاعىلعان.
بۇعان دەيىن ەلىمىزدىڭ ىشكى ىستەر مينيسترلىگى ارمان جۇماگەلديەۆتىڭ 2021 -جىلى جەلتوقساندا شەتەلدەن كەلگەنىن جانە قاڭتار وقيعاسى كەزىندە الماتىدا بولعانىن حابارلاعان. ونىڭ 5 ادامنان تۇراتىن قىلمىستىق توبى 2022 -جىلدىڭ 7-قاڭتارىندا ۇيىمداستىرىلعان ارناۋلى وپەراتسيا بارىسىندا ۇستالدى. سول كەزدە كۇدىكتىلەردەن ءارتۇرلى قارۋ-جاراق پەن ولاردىڭ وق-دارىلەرى، سۋىق قارۋ جانە بروندى اۆتوموبيل تاركىلەندى.
ق ر باس پروكۋراتۋراسى ارنايى پروكۋرورلار قىزمەتىنىڭ باستىعى ريزابەك وجاروۆ «ديكي ارمان» توبى قاڭتار وقيعاسى كەزىندە 24 بەيبىت تۇرعىندى ۇرلاپ، كۇشتەپ ۇستاعانىن ايتقان ەدى.
