باتا بەرگەن كورەي قىزى ەلدى ءسۇيسىنتتى

قىزىلوردالىق كورەي قىزى ۆەرونيكا نوگايدىڭ باتا بەرگەن ءساتى كوپشىلىكتى ءسۇيسىنتتى. ۆيدەونى الەۋمەتتىك جەلى قولدانۋشىسى ريما تۇرمانوۆا Facebook پاراقشاسىندا جاريالادى.

ۆەرونيكانىڭ جاسى - نەبارى بەستە. ءوزى تۇراتىن قارماقشى اۋدانىنىڭ III ينتەرناتسيونال اۋىلىنداعى №108-ورتا مەكتەپتىڭ مەكتەپالدى دايارلىق توبىندا ءتالىم الىپ ءجۇر. قازاق ءتىلدى توپتا بولۋعا ىقىلاس تانىتقان ءوزى ەكەن.

«ءبىر كۇنى تاماقتانىپ بولىپ، ورنىمىزدان تۇرا بەرگەندە «قانە، قولدارىڭدى جايىڭدار!» دەپ، قايتادان وتىرعىزدى. تاڭىرقاپ قالدىق. قىزىم ەكى ءتۇرلى باتا بىلەدى. بالاباقشا تاربيەشىلەرى ۇيرەتكەن»، - دەدى اناسى ميلانا نوگاي.

ميلانا دا - مۇعالىم. قورقىت اتا اتىنداعى قىزىلوردا ۋنيۆەرسيتەتىنىڭ قازاق توبىندا وقىپ، بيىل ماگيستراتۋرانى ءبىتىردى. كىشكەنتاي ۆەرونيكا دا وسكەندە اناسى سياقتى مۇعالىم بولۋدى ارماندايدى.