اتىراۋدا سالىنىپ جاتقان جولدىڭ جيەگىن جاڭبىر سۋى شايىپ كەتتى

اتىراۋدان رەسەي شەكاراسىنا دەيىنگى ارالىقتا سالىنىپ جاتقان جولدىڭ جيەگىن جاڭبىر سۋى شايىپ كەتتى، دەپ حابارلايدى قازاقپارات ءتىلشىسى.

جاڭبىردان كەيىن تاس جولدىڭ جيەگىندە شۇڭقىر پايدا بولعان. وسىعان بايلانىستى «قازاۆتوجول» ۇ ك» ا ق اتىراۋ وبلىستىق فيليالى جولداعى احۋالدى ءتۇسىندىردى.

«قازىر رەسپۋبليكالىق ماڭىزى بار «اتىراۋ- استراحان» اۆتوموبيل جولىنىڭ 853-893 شاقىرىمى ارالىعىندا قايتا جاڭعىرتۋ جۇمىستارى ءجۇرىپ جاتىر. مەردىگەر مەكەمە - «سينە ميداس» ج ش س. بىرنەشە كۇن تولاسسىز جاۋعان جاڭبىر سۋى تاس جولدىڭ جيەگىن شايعان. وسىعان بايلانىستى تاپسىرىس بەرۋشىدەن مەردىگەر مەكەمەگە قالىپقا كەلتىرۋ جۇمىستارىن جۇرگىزۋ تۋرالى تاپسىرما بەرىلگەن بەينەجازبادا كورسەتىلگەن 156-شاقىرىم تۇسىنداعى جولدىڭ جيەگىندە پايدا بولعان شۇڭقىردى قالپىنا كەلتىرۋ جۇمىسى جۇرگىزىلىپ جاتىر»، - دەلىنگەن وبلىستىق فيليالدىڭ اقپاراتىندا.

قالپىنا كەلتىرۋ جۇمىسىنا قاجەتتى تەحنيكا مەن ماتەريال جەتكىلىكتى. مەردىگەر كومپانيانىڭ جۇمىسى تەحنيكالىق قاداعالاۋ ماماندارىنىڭ قاتاڭ باقىلاۋىندا بولادى.

ەسكە سالا كەتەلىك، بۇدان بۇرىن اتىراۋدان رەسەيمەن شەكاراعا دەيىنگى جولدى جوندەۋگە 18 ميلليارد تەڭگە بولىنگەنىن حابارلاعان بولاتىنبىز.

«قازاۆتوجول» ۇ ك» ا ق اتىراۋ فيليالىنىڭ ديرەكتورى بولاتبەك ايتبايەۆتىڭ مالىمەتىنشە، وڭىردە رەسپۋبليكالىق اۆتوجول جەلىسى - 1126 شاقىرىم.

«بۇل ءوڭىر اۋماعىمەن رەسەيدىڭ استراحان وبلىسىنان اتىراۋ، ماڭعىستاۋ وبلىستارى ارقىلى تۇرىكمەنستان رەسپۋبليكاسىمەن شەكاراعا دەيىنگى، ورال- اتىراۋ جانە اقتوبە- اتىراۋ باعىتىنداعى جول وتەدى. بيىل رەسپۋبليكالىق جولداردى دامىتۋعا 36 ميلليارد تەڭگە ءبولىندى. ونىڭ ىشىندە 18 ميلليارد تەڭگە اتىراۋدان رەسەي فەدەراتسياسىنىڭ شەكاراسىنا دەيىنگى جولدى رەكونسترۋكتسيالاۋعا جۇمسالادى. قاندىعاش - ماقات باعىتىنداعى تراسساعا 7,9 ميلليارد، ورال- اتىراۋ جولىن رەكونسترۋكتسيالاۋ ءۇشىن جوبالاۋ سمەتالىق قۇجاتتاما ازىرلەۋگە 300 ميلليون تەڭگە قارالىپ وتىر»، - دەدى بولاتبەك ايتبايەۆ.