لاتىن قارپىنە قاشان كوشەتىنىمىزدى ايتۋ قيىن - ءتىل كوميتەتى
«قازىرگى لاتىن گرافيكاسى بويىنشا جوبا دايىن. بۇل جوبا بىرنەشە ساراپتاۋدان ءوتتى. رەسپۋبليكانىڭ 5 وڭىرىندە - استانا، الماتى قالالارىندا، شىعىس قازاقستان، اقمولا، قاراعاندى وبلىستارىندا الىپبيگە بايلانىستى وقۋشىلارعا، جاستارعا، مەملەكەتتىك ەرەسەك ادامدارعا ساراپتاما جۇمىستارى جۇرگىزىلدى. ورفورگرافيالىق جۇمىس توبىندا وتىزعا جۋىق عالىم بار. ولار ەلىمىزدىڭ جوعارى وقۋ ورىندارىنان كەلگەن، وسى سالانىڭ ماماندارى. ا. بايتۇرسىن ۇلى اتىنداعى ءتىل ءبىلىمى ينستيتۋتى ەملە ەرەجەسىن دايىندادى. وسى ايدىڭ سوڭىندا نەمەسە كەلەسى ايدىڭ باسىندا ارنايى قۇرىلعان كوميسسيا لاتىن ءالىپبيى جوباسىن قارايدى»، - دەدى ەربول تىلەشوۆ ق ر پرەزيدەنتى ءىس باسقارماسىندا «مەملەكەتتىك ءتىل - تاتۋلىق نەگىزى» اتتى دوڭگەلەك ۇستەلدە.
عالىمنىڭ ايتۋىنشا، لاتىن قارپىنە قاي جىلى كوشەتىنىمىزدى ناقتى ايتۋ قيىن.
«قوعامدا «لاتىن ءالىپبيىن ازىرلەۋشىلەر ءۇنسىز قالدى، قابىلدانبايتىن بولدى ما؟» دەگەن اڭگىمەلەر بار، ونى الەۋمەتتىك جەلىدەن وقىپ ءجۇرمىز. انىعىندا ولاي ەمەس، داۋ- دامايسىز، وسىنداي ادىستەمەلىك- زەرتتەۋ جۇمىستارى ءجۇرىپ جاتىر. «ى» مەن ەكى «ي» - ءدىڭ تاڭبالانۋى بويىنشا عالىمدار اراسىندا پىكىر قايشىلىعى ءالى بار. ارينە، احمەت بايتۇرسىنوۆ بەلگىلەگەن 28 تاڭبامەن شىعۋعا بولار ەدى، ءبىراق ءتىل دە جاھاندانۋسىز تۇرا المايدى. تىلىمىزگە سىرتتان ەنگەن «ۆ» ، «ف» ، «ھ» دىبىستارىن قالدىرۋ كەرەك پە، قالدىرماساق «فۋتبول» ءسوزىن قالاي اتاپ، قالاي جازامىز دەگەن ماسەلە بار. ءارىپتى قالدىرۋ سىرت كوزگە وڭاي كورىنگەنىمەن، ءبارى ەملە ەرەجەسىنە ساي كەلۋى كەرەك. سوندىقتان، عىلىمي- ساراپتاۋ جۇمىستارىن كۇشەيتىپ جاتىرمىز»، - دەدى ەربول تىلەشوۆ.
ايتا كەتەيىك، لاتىن الىپبيىنە كوشۋ تاقىرىبى 2017 -جىلى كوتەرىلە باستادى.
سول جىلى 26 - قازاندا «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» پرەزيدەنت جارلىعى شىقتى.
بىلتىر ۇلىتاۋ وبلىسىندا وتكەن ۇلتتىق قۇرىلتايدا پرەزيدەنت قاسىم- جومارت توقايەۆ لاتىن الىپبيىنە كوشۋدە جان- جاقتى، تەرەڭ تالداۋ جاساپ بارىپ، تۇبەگەيلى شەشىم قابىلداۋ كەرەگىن ايتقان ەدى.
