توقايەۆ ورتالىق ازياداعى قاۋىپسىزدىك جونىندەگى ديالوگتى كەلەسى جىلى قازاقستاندا وتكىزۋدى ۇسىندى
«الەمدەگى ءتارتىپ تەز وزگەرىپ، ءبىزدىڭ ءوڭىردىڭ تۇراقتىلىعىن بۇزۋعا تالپىنىستار جاسالىپ جاتقان جاعدايدا ەلدەرىمىزدىڭ قاۋىپسىزدىك سالاسىنداعى ءوزارا ءىس- قيمىل تەتىكتەرىن جەتىلدىرۋدىڭ ماڭىزى ارتا ءتۇستى. قۇرمەتتى پرەزيدەنتتەر، اتالعان ماڭىزدى سالادا تۇراقتى كونسۋلتاتسيالار مەحانيزمىن ىسكە قوسۋ جونىندەگى قازاقستاننىڭ باستاماسىنا قولداۋ بىلدىرگەندەرىڭىز ءۇشىن سىزدەرگە العىس ايتامىن. ناقتى الدىن الۋ شارالارىن ازىرلەۋ ءۇشىن قاۋىپسىزدىك كەڭەستەرىنىڭ حاتشىلارى دەڭگەيىندە ورتالىق ازياداعى قاۋىپسىزدىك جانە ىنتىماقتاستىق جونىندەگى ديالوگتى كەلەسى جىلى قازاقستاندا وتكىزۋدى ۇسىنامىن»، - دەدى پرەزيدەنت.
قاسىم- جومارت توقايەۆ مادەني- گۋمانيتارلىق ىنتىماقتاستىقتى نىعايتۋ ماسەلەلەرىنە ارنايى توقتالدى.
وڭىردەگى دەموگرافيالىق ءوسىمنىڭ ورنىقتى ەكەنىن ەسكەرسەك، ءبىلىم جانە عىلىم سالاسىنداعى بايلانىستاردى كەڭەيتۋدىڭ ماڭىزى ارتا تۇسەدى.
«قازاقستان ورتالىق ازيا مەملەكەتتەرىمەن جوعارى وقۋ ورىندارى اراسىنداعى ءوزارا ىقپالداستىقتى بەلسەندى تۇردە دامىتىپ كەلەدى. بىلتىر قىرعىزستاندا قازاقستاننىڭ جوعارى وقۋ ورىندارىنىڭ فيليالدارى اشىلدى. سونىمەن قاتار تاجىكستاننىڭ جوعارى وقۋ ورىندارى بازاسىندا بىرلەسكەن فاكۋلتەتتەر اشۋ ءىسى قاراستىرىلىپ جاتىر. قازاقستان مەن وزبەكستاندا ەكى ەلدىڭ جەتەكشى ۋنيۆەرسيتەتتەرىنىڭ فيليالدارىن اشۋ كوزدەلىپ وتىر. بۇل ماڭىزدى سالاداعى ىنتىماقتاستىقتى كەڭەيتۋگە ءبىزدىڭ دۋشانبەدەگى كەزدەسۋىمىز اياسىندا 2- رەكتورلار فورۋمى مەن ورتالىق ازيا ەلدەرى عالىمدارىنىڭ 1- فورۋمىن وتكىزۋ ءوز سەپتىگىن تيگىزەدى»، - دەدى مەملەكەت باسشىسى.
