سەناتور وتاندىق تەلەارنالاردا شەتەلدىك سەريالدارعا تىيىم سالۋدى سۇرادى
وسى ورايدا ول ۇكىمەت باسشىسىنىڭ ورىنباسارى تامارا دۇيسەنوۆانىڭ اتىنا دەپۋتاتتىق ساۋال جولدادى، دەپ حابارلايدى قازاقپارات ءتىلشىسى.
«بۇگىن ەلىمىزدىڭ بولاشاعىنا جانە ۇلتتىق ەرەكشەلىگىنە قاتىستى ماڭىزدى ماسەلەنى كوتەرگىم كەلەدى. تەلەديداردى قوسا قالساڭ، شەتەلدىك تەلەسەريالدار كورسەتىلىپ جاتقانىن بايقايسىزدار. بۇل سەريالداردى ساتىپ الۋ ءۇشىن بيۋجەتتەن ميلليونداعان قاراجات جۇمسالاتىنى انىق. تەلەديدار ءبىزدىڭ قوعام ومىرىندە ۇلكەن ءرول اتقارادى. ول ءبىزدىڭ ازاماتتاردىڭ تالعامىن، پىكىرلەرىن جانە قۇندىلىقتارىن قالىپتاستىرادى. بۇگىن ءبىز ءوزىمىزدىڭ مادەني بولمىسىمىزعا جانە شىعارماشىلىق سالالارىمىزعا قىسىم جاسايتىن شەتەلدىك سەريالداردىڭ تولقىنىنا تاپ بولدىق. ءبىزدىڭ ەكراندارىمىزدا شەتەلدىك تەلەحيكايالاردى كورسەتۋدى شەكتەۋ - وتاندىق كينو مەن تەلەحيكايالارعا جاقسى مۇمكىندىك بەرەدى»، - دەدى ق. تاستەكەيەۆ.
ونىڭ ايتۋىنشا، 2022-جىلدىڭ قورىتىندىسى بويىنشا قازاقستانداعى ءىرى قالالاردا ادامداردىڭ كۇن سايىن 47 پايىزى، اپتا سايىن 72 پايىزى تەلەديدار قاراعان.
«جالپى، تەلەديدارداعى شەتەلدىك ءونىمنىڭ ەداۋىر بولىگى ۇلتتىق مادەني سايكەستىككە قاۋىپ توندىرەدى. شەتەلدىك سەريالداردىڭ كوپشىلىگىندە باسقا مادەني ستەرەوتيپتەر مەن قۇندىلىقتار باسىم، بۇل حالىققا تەرىس اسەر ەتۋى مۇمكىن. شەتەلدىك تەلەحيكايالارعا تىيىم سالۋ نەمەسە شەكتەۋ قازاقستاندىق تەلەۆيزيا يندۋسترياسىنىڭ دامۋىنا ىقپال ەتەدى. ماسەلەن، فرانسيادا تەلەارنالاردى فرانسۋز فيلمدەرىنىڭ بەلگىلى ءبىر سانىن تاراتۋعا مىندەتتەيتىن زاڭدار بار. سونداي-اق، كينويندۋستريا ءۇشىن سالىقتىق جەڭىلدىك قاراستىرىلعان. وڭتۇستىك كورەيا كينويندۋسترياعا قارجىلىق قولداۋ، سالىق جەڭىلدىكتەرىن جانە سۋبسيديا ۇسىنادى»، - دەدى سەناتور.
ونىڭ پايىمىنشا، وتاندىق تەلەارنالاردا شەتەلدىك تەلەحيكايالاردى كورسەتۋدى شەكتەيتىن زاڭنامالىق اكتىلەرگە وزگەرىس ەنگىزۋ كەرەك.
«تەلەراديو حابارلارىن تاراتۋ تۋرالى» زاڭنىڭ 28-بابىندا بەكىتىلگەن وتاندىق تەلەارنالاردىڭ اپتا سايىنعى تەلەراديو حابارلارىن تاراتۋ كولەمىندە وتاندىق تەلەباعدارلامالاردىڭ سانىن ارتتىرۋ تۋرالى ماسەلەنى قاراۋ ماڭىزدى. كينو جانە تەلەديدار سالاسىندا ءبىلىم بەرۋ باعدارلامالارىن قۇرۋ ارقىلى، ياعني عىلىم، جاڭا تەحنولوگيالار، ونەركاسىپتىڭ دامۋ تەندەنتسيالارى، مادەنيەت، تاريح جانە باسقا دا ماڭىزدى باعدارلامالاردى ەفيرگە شىعارۋ قاجەت»، - دەدى دەپۋتات.
