ەلوردالىقتار جالعا العان پاتەرىن جەكەشەلەندىرۋگە مۇمكىندىك الادى

ەلوردادا جالعا بەرىلگەن پاتەرلەردى جەكەشەلەندىرۋگە مۇمكىندىك بەرىلمەك. بۇل تۋرالى استانا قالالىق تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باسشىسى ءانۋار سايپوۆ ايتتى، دەپ حابارلايدى قازاقپارات ءتىلشىسى.

«ۇكىمەتتىڭ وڭ قورىتىندىسى بار. ياعني، «ساتىپ الۋ قۇقىعىنسىز» تۇسىنىگى جويىلىپ، ادامدارعا ساتىپ الۋعا مۇمكىندىك بەرىلەدى. ءبىراق، جەكەشەلەندىرۋدىڭ تۇسىندىرمەسى بار. بۇعان دەيىن قالعان قۇنىمەن جانە نارىقتىق باعامەن ساتۋ ماسەلەسى قاراستىرىلعان بولاتىن. نارىقتىق باعا بولمايتىندىعى ءسوزسىز. قالعان قۇنىن وتەيدى. قازىرگى ۋاقىتتا جەكەشەلەندىرۋ تەتىكتەرى قاراستىرىلىپ جاتىر. زاڭ قابىلدانعانعا دەيىن پىكىر بىلدىرە المايمىن. ءبىراق، جەكەشەلەندىرۋ بولادى»، - دەدى ول قالالىق ءماسليحاتتا وتكەن جاريا تىڭداۋ بارىسىندا.

ونىڭ دەرەگىنشە، قازىرگى ۋاقىتتا ەلوردا اكىمدىگىنىڭ بالانسىندا شامامەن 5 مىڭ جالعا بەرىلگەن پاتەر بار. ولاردا حالىقتىڭ وسال توپتارى تۇرىپ جاتىر. بۇل پاتەرلەر ساتىپ الۋ قۇقىعىنسىز بەرىلگەن.

ايتا كەتەيىك، بۇگىندە ەلوردادا 46267 ازامات باسپانا كەزەگىندە تۇر. ولار: كوپبالالى وتباسىلار، جەتىم بالالار، مەملەكەتتىك قىزمەتشىلەر، حالىقتىڭ الەۋمەتتىك وسال توپتارى، جالعىز باسپاناسى اپاتتى دەپ تانىلعان ادامدار.