اقتوبە «كۇندەلىك» ەلەكتروندى جۋرنالىنان باس تارتتى

اقتوبە. قازاقپارات - جاڭا وقۋ جىلىنان باستاپ «كۇندەلىك» ەلەكتروندى جۋرنالى پايدالانىلمايدى.

اقتوبەدە Bilimland كومپانياسىنىڭ «ءبىلىم كلاس» جۋرنالى قولدانىلا باستادى، دەپ حابارلايدى قازاقپارات ءتىلشىسى.

اقتوبەدە بيىلدان باستاپ «ءبىلىم كلاس» جۋرنالى قولدانىسقا ەنگىزىلدى.

سەبەبى وڭىردە «اقتوبە وبلىسىنداعى شاعىن جيناقتى مەكتەپتەردىڭ الەۋەتىن ارتتىرۋ» اتتى پيلوتتىق جوبا جۇزەگە اسىرىلىپ جاتىر.

«ءار اۋدان ورتالىعىنداعى 12 مەكتەپ، 134 شاعىن جيناقتى مەكتەپتى جابدىقتاۋعا 5 ميلليارد تەڭگە بولىنەدى. 12 مەكتەپ تۇگەل جاڭارتىلىپ، وعان 3 ميلليارد تەڭگە جۇمسالادى. ال 134 شاعىن مەكتەپ ءۇشىن 2 ميلليارد تەڭگە قاراستىرىلعان. وندا ەكى كابينەتكە كومپيۋتەر، ينتەراكتيۆتى تاقتا الىنادى. ال «ءبىلىم كلاس» جۋرنالىن قولدانۋدىڭ ءوز ارتىقشىلىعى بولادى. مۇندا اۋىل مەكتەپتەرىنىڭ مۇعالىمدەرى ءۇشىن ەلەكتروندى نۇسقادا دايىن ماتەريالدار جۇكتەلەدى. بارلىق سيفرلىق رەسۋرستى تەگىن قولدانا الامىز. وندا 26 مىڭنان استام ساباق، 8 مىڭعا جۋىق پايدالى اقپارات ورنالاستىرىلعان. ءبارى مۇعالىمگە، وقۋشىعا قولجەتىمدى»، - دەدى اقتوبە وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا.

ايتا كەيىك، بيىل تەك اقتوبە وبلىسى «ءبىلىم كلاس» جۋرنالىن قولدانا باستادى.

بۇل - ەلىمىز بويىنشا پيلوتتىق جوبا.

ەسكە سالساق، ءماجىلىس دەپۋتاتى ەرلان سايىروۆ مەكتەپ وقۋشىلارىنا ارنالعان «كۇندەلىك» جۇيەسىنىڭ ولقىلىقتارىن پارلامەنتتە كوتەردى.

بۇل جونىندە دەپۋتات پرەمەر-ءمينيستردىڭ ورىنباسارى تامارا دۇيسەنوۆاعا، باس پروكۋرور بەرىك اسىلوۆقا ساۋال جولدادى.