تاۋعا قاشاپ جازۋ جازعان مادەنيەت ءۇيىنىڭ ديرەكتورى قىزمەتىنەن كەتتى

اقتوبە. قازاقپارات - ماڭعىستاۋداعى ىبىقتى سايىنا قاشاپ جازۋ جازىپ، كەيىن كەشىرىم سۇراعان اقتوبە قالالىق زاعيپتار ءۇيىنىڭ ديرەكتورى مانات كوشەربايەۆ ءوز ەركىمەن جۇمىستان كەتتى، دەپ حابارلايدى قازاقپارات ءتىلشىسى.

اقتوبە قالالىق مادەنيەت جانە تىلدەردى دامىتۋ ءبولىمىنىڭ باسشىسى گۇلجاينا بيسەنعاليەۆانىڭ ايتۋىنشا، قالالىق زاعيپتار ءۇيىنىڭ ديرەكتورى ماناس كوشەربايەۆ قىزمەتىنەن كەتتى.

«ماناس كوشەربايەۆ قالاعا كەلگەن سوڭ كەشە شاقىرتىپ الدىق. ول سول كەزدە ءوز ەركىمەن جۇمىستان شىعاتىنىن ايتىپ، ارىز جازدى. اكىمشىلىك جازانى پوليتسيا قولدانادى. ال جۇمىستان شىققان ادامعا تارتىپتىك جازا قاراستىرىلمادى»، - دەدى گۇلجاينا بيسەنعالييەۆا.

ەسكە سالساق، ەڭبەك دەمالىسىنا ماڭعىستاۋعا بارعان ءانشى، اقتوبە قالالىق زاعيپتار ءۇيىنىڭ ديرەكتورى ماناس كوشەربايەۆ بورلى تاۋعا قاشاپ جازدى.

كەيىن «اقنازىك» دەپ جازىلعانى كورسەتىلدى.

كوپ ۇزاماي ماناس كوشەربايەۆ الەۋمەتتىك جەلىدەگى پاراقشاسىندا جازبا قالدىرىپ، بەينەۇندەۋ جاريالادى.

«مەن كوشەربايەۆ ماناس مارات ۇلى 24- تامىزدا ماڭعىستاۋ وبلىسى اقتاۋ قالاسى ىبىقتى سايدا بولعان جاعدايعا بايلانىستى تۇسىنىكتەمە بەرگىم كەلەدى. ىبىقتى ساي - ماڭعىستاۋدىڭ كوركەم جەرلەرىنىڭ ءبىرى. وكىنىشتىسى، قاراۋسىز قالعان. جولى وتە ناشار، جان- جاعى قوقىسقا تولى. سول ادەمى، كەرەمەت ۇڭگىردىڭ ءىشى تولعان جازۋ، ادەپسىز سوزدەر. سونداي ءبىر دورەكى ءسوزدى ادەمى ەسىمگە اينالدىرماق نيەتىم عانا بولدى. اڭداۋسىز جازا باستىم! جاڭىلمايتىن جاق، سۇرىنبەيتىن تۇياق بولمايدى. اسا قاتتى سوكپەڭىزدەرشى! تاريحي جەرگە قىلداي قيانات قىلۋ ويىمدا دا بولمادى. بارشا وتانداستارىمنان، ماڭعىستاۋ جۇرتىنان باسىمدى ءيىپ كەشىرىم سۇرايمىن! عافۋ ەتىڭىزدەر»، - دەپ كەشىرىم سۇرادى.