اباي وبلىسىندا ورمانداعى الاپات ءورت قايتالانباس ءۇشىن نە ىستەلىپ جاتىر

سەمەي. قازاقپارات - اباي وبلىسىندا ورمانداعى بيىلعى الاپات ءورت قايتالانباس ءۇشىن ءورت ءسوندىرۋ بەكەتتەرىندەگى ازىرلىكتى كۇشەيتۋ جانە ەسكىرگەن تەحنيكانى جاڭارتۋ جۇمىستارى قولعا الىنۋدا، دەپ حابارلايدى قازاقپارات ءتىلشىسى.

وبلىستىق توتەنشە جاعدايلار دەپارتامەنتىنىڭ باستىعى ماناربەك شاپاعاتوۆ باسپا ءسوز ءماسليحاتىنا قاتىسىپ، وڭىردە ءورت قاۋپى جوعارى كەزەڭنىڭ قالاي ءوتىپ جاتقانىن ايتىپ بەردى.

«اباي وبلىسىنىڭ اۋماعىندا بيىلعى ءورت قاۋپى جوعارى كەزەڭ باستالعالى 175 ورمان ءورتى تىركەلگەن. بۇل كورسەتكىش وتكەن جىلمەن سالىستىرعاندا %24,7 عا تومەندەدى. الايدا ءورت شارپىعان اۋدان كولەمى 66 مىڭ گەكتاردى قۇراپ، 85 ەسەگە ارتىپ وتىر. وعان ارينە، سەمەي ورمانىنداعى الاپات ءورت سەبەپكەر. ورمان ورتتەرىمەن كۇرەستىڭ تيىمدىلىگى ءتىلسىز جاۋدىڭ دەر كەزىندە انىقتالۋىنا، سول جەرگە تەحنيكا مەن ادامداردىڭ جەدەل جەتۋىنە، قاجەتتى قۇرال-جابدىقتارمەن جابدىقتالۋىنا بايلانىستى. سونداي-اق ورمان شارۋاشىلىعى مەكەمەلەرى قىزمەتكەرلەرىنىڭ شتاتتىق سانى، ءتيىستى دەڭگەيگە قارجىلاندىرىلۋى جانە ورمان القاپتارى ماڭىنداعى اۆياتسيالىق تەحنيكالاردىڭ بولۋى اسا ماڭىزدى»، - دەيدى ول.

ايماقتىق شالعاي ەلدى مەكەندەرىندەگى جۇمىس ىستەپ تۇرعان ءورت ءسوندىرۋ بەكەتتەرىندە ازىرلىكتى كۇشەيتۋ جانە ەسكىرگەن تەحنيكانى جاڭارتۋ ماقساتىندا دەپارتامەنت تاراپىنان جەرگىلىكتى اتقارۋشى ورگانداردىڭ بالانسىنا 8 ءورت ءسوندىرۋ تەحنيكاسى تاپسىرىلدى. سونىمەن قاتار قازىرگى تاڭدا اۋىلدارداعى ءورت ءسوندىرۋ بەكەتتەرىندە تەحنيكالاردى جاڭارتۋ جۇمىستارى جۇرگىزىلىپ جاتىر.

«بەسقاراعاي، بورودۋليحا، اياگوز جانە جارما اۋداندارىندا ءورت بەكەتتەرىن قۇرۋ ءۇشىن 5 ءورت ءسوندىرۋ تەحنيكاسى بەرىلەدى. تابيعي ورتتەرگە قاتىستى جاعدايدى تۇراقتاندىرۋ ءۇشىن ماسەلەنى كەشەندى شەشۋ كەرەك»، - دەيدى ماناربەك شاپاعاتوۆ.

ەسكە سالساق، بيىل 8- ماۋسىم كۇنى اباي وبلىسىنداعى «سەمەي ورمانى» رەزەرۆاتى اۋماعىندا الاپات ءورت شىققان بولاتىن.