ۇلتتىق بانك ءتوراعاسى بازالىق ستاۆكا نەلىكتەن تومەندەگەنىن ءتۇسىندىردى

None
استانا. قازاقپارات - بۇگىن بازالىق ستاۆكا 16,5 پايىزعا دەيىن تومەندەدى. ۇلتتىق بانكتىڭ ءتوراعاسى عالىمجان ءپىرماتوۆ ونىڭ سەبەبىن ءتۇسىندىرىپ، مالىمدەمە جاسادى، دەپ حابارلايدى قازاقپارات.

ۇلتتىق بانكتىڭ اقشا-كرەديت ساياساتى كوميتەتى بازالىق مولشەرلەمەنى 25 ب. ت. %16,5 عا دەيىن تومەندەتۋ جونىندە شەشىم قابىلدادى.

ينفلياتسيا مەن ەكونوميكاداعى وسىمگە قاتىستى جاڭا بولجامدارىمىز ماكروەكونوميكالىق جاعدايدىڭ وزگەرۋىن باعالاۋعا مۇمكىندىك بەردى.

«بۇگىن سول باعالاۋدىڭ ناتيجەسىن بولىسكىم كەلەدى. باعا تۇراقتىلىعىنا جاۋاپتى ورگان رەتىندە ۇلتتىق بانك ءوزىنىڭ الداعى ءىس-ارەكەتتەرى تۋرالى حابار بەرىپ، سەنىمدى دەرەكتەر مەن بولجامدارعا سۇيەنۋ ارقىلى بايىپتى شەشىم قابىلداعاندى ءجون كورەدى. ءبىز وتكەن جىلى بازالىق مولشەرلەمەنى بىرتىندەپ كوتەرگەن بولاتىنبىز. قازىر سونىڭ ەكونوميكاعا قالاي اسەر ەتكەنىن كورىپ وتىرمىز. ينفلياتسيانىڭ قارقىنى بىرتىندەپ باياۋلاي باستادى. بۇل ءبىزدىڭ باعالاۋ جۇرگىزەتىن ىسىمىزگە سەنىمدىلىكتى ارتتىرىپ، ينفلياتسيانىڭ تۇراقتالۋ ءۇردىسىن كۇشەيتە تۇسەدى. سىرتقى ورتا دەزينفلياتسيالىق اسەرىن ساقتاۋدا. الەمدەگى ورتالىق بانكتەردىڭ اقشا- كرەديت شارتتارىن قاتاڭداتۋى، ازىق-تۇلىك باعاسىنىڭ تومەندەۋى - ىشكى باعانى ۇستاپ تۇرۋعا ىقپال ەتتى. الايدا ينفلياتسيا تۇراقتىلىعىن جوعالتپاعاندىقتان، دامىعان ەلدەردە مولشەرلەمەنى تومەندەتە باستاۋ مەرزىمى كەيىنگە قالىپ قويىپ وتىر. رەسەيدە رۋبل باعامى السىرەپ، تۇتىنۋشىلىق سۇرانىس ارتۋىنان ينفلياتسيالىق قىسىمنىڭ كۇشەيە تۇسكەنى بايقالا باستادى. ينفلياتسيانىڭ تومەندەۋ ۇردىسىندە تۇراقسىزدىق بارىن دا كورىپ وتىرمىز. مىسالى، بازالىق ينفلياتسيا مەن ماۋسىمدىق فاكتوردى ەسكەرمەگەندەگى ينفلياتسيا كورسەتكىشتەرى باياۋلاۋىن توقتاتتى. كەڭەيىپ جاتقان فيسكالدىق قولداۋ مەن جوعارى دەڭگەيدەگى ينفلياتسيالىق كۇتۋلەر نەگىزگى فاكتورلار بولىپ قالۋدا. ىشكى تۇراقتى سۇرانىس ءالى دە جوعارى ينفلياتسياعا ىقپال ەتىپ كەلەدى. جانار-جاعارماي باعاسىنىڭ كوتەرىلۋىنەن بولعان جاناما اسەر بايقالا باستاعانىمەن، ول تەڭگە باعامىنىڭ ديناميكاسىمەن ءىشىنارا تەڭەستىرىلگەنىن دە اتاپ وتكەن ءجون»، - دەيدى بانك ءتوراعاسى.

وسىلايشا سىرتقى فاكتورلاردىڭ قىسىمى ءبىرشاما السىرەگەن سوڭ تاۋەكەلدەردىڭ جيىنتىق بالانسى ءالسىز دەزينفلياتسيالىق ايماقتا قالىپ وتىر.

«جالپى ءبىزدىڭ ارەكەتتەرىمىز بەن قازىرگى شەشىمىمىز ينفلياتسيانىڭ تومەندەۋ تراەكتورياسىن بولاشاقتا ساقتاپ قالۋعا باعىتتالعان. ۇلتتىق بانك بازالىق مولشەرلەمەدە ەسەپكە المايتىن تۇرعىن ءۇي كوممۋنالدىق قىزمەتتەرى تاريفتەرىنىڭ كوتەرىلۋىنەن بولعان تىكەلەي اسەردى ەسكەرمەسەك، 5 پايىزدىق ورتامەرزىمدى ماقساتقا 2025-جىلدىڭ سوڭىنا تامان قولجەتكىزۋ كۇتىلىپ وتىر»، - دەيدى ول.

ونىڭ ايتۋىنشا، وسى شەشىمگە تۇرتكى بولعان فاكتورلار - ناقتى جانە كۇتىلەتىن ينفلياتسيا ديناميكاسى، ىشكى ەكونوميكا فاكتورلارى، سىرتقى ەكونوميكالىق كونيۋنكتۋرا.

بازالىق ستسەنارييدە ينفلياتسيا بولجامدارى وزگەرىسكە ۇشىرادى. قىسقا مەرزىمدەگى بەلگىسىزدىك تومەندەدى.

«ءبىزدىڭ بولجامىمىز بويىنشا، جىلدىق ينفلياتسيا 2023-جىلى %10-12، 2024-جىلى %7,5-9,5 جانە 2025-جىلى %5,5-7,5 شەگىندە قالىپتاسادى. ينفلياتسيانىڭ باياۋلاۋ ءۇردىسى جالعاسادى. ءبىراق بەلگىلەنگەن پروينفلياتسيالىق فاكتورلار 2025-جىلدىڭ سوڭىنا قاراي %5 ينفلياتسيا نىساناسىنا جەتۋ جولىندا بارىنشا قاتاڭ اقشا-كرەديت ساياساتىن ساقتاۋعا دايىن بولۋدى تالاپ ەتەدى. ۇلتتىق بانك بازالىق مولشەرلەمەدە ەسەپكە المايتىن تۇرعىن ءۇي كوممۋنالدىق قىزمەتى تاريفتەرىنىڭ كوتەرىلۋىنەن بولعان تىكەلەي اسەردى ەسكەرمەسەك، %5 دىق ورتامەرزىمدى ماقساتقا 2025-جىلدىڭ سوڭىنا قاراي قولجەتكىزۋ كۇتىلۋدە. بۇل رەتتە فيسكالدىق ساياسات، جانار-جاعارماي باعاسىن جانە تۇرعىن ءۇي كوممۋنالدىق قىزمەتتەرىنىڭ تاريفتەرىن بەلگىلەۋ سالاسىندا قابىلدانىپ جاتقان شارالار، ەكونوميكاداعى تۇتىنۋ مەن ۇنەمدەۋ اراسىنداعى بالانسى بارىنشا ماڭىزدى بولادى»، - دەپ اتاپ ءوتتى عالىمجان ءپىرماتوۆ.

سوڭعى جاڭالىقتار