جانىبەك ءالىمحان ۇلى چەمپيوندىق جەكپە-جەگى الدىندا جاتتىقتىرۋشىسىن اۋىستىردى

استانا. قازاقپارات - ورتا سالماقتا WBO نۇسقاسى بويىنشا الەم چەمپيونى اتاعىنا يە وتانداسىمىز جانىبەك ءالىمحان ۇلى جاتتىقتىرۋشىسىن اۋىستىردى.

بۇل تۋرالى Instagram پاراقشاسىندا حابارلادى.

قازاقستاندىق كاسىپقوي بوكسشىنى بۇعان دەيىن امەريكالىق باددي ماكگيرت جەكپە-جەكتەرگە دايىنداپ كەلگەن. ول ايگىلى ارتۋرو گاتتي، مايك تايسون سەكىلدى تانىمال سپورتشىلاردى شىڭداعان باپكەر ەدى. ەندى وتانداسىمىزدى برايان ۆيلوريا ەسىمدى امەريكالىق مامان جاتتىقتىرادى.

Посмотреть эту публикацию в Instagram

Публикация от JANIBEK | QAZAQ STYLE (@janibek_alimkhanuly)

جاڭا باپكەر. جاڭا سەرپىن. جاڭا دەڭگەي! برايان ۆيلوريامەن جۇمىستى باستادىق! برايان اۋەسقوي بوكستا دا كاسىپقوي بوكستا دا الەم چەمپيونى بولعان بوكسشى. كاسىپقوي بوكستا 4 دۇركىن الەم چەمپيونى اتانعان. ەكى سالماقتا چەمپيون بولعان. ەكى چەمپيوندىق تيتۋل جەڭىمپازى. مىقتى مامانمەن قازاق ءستيلىن ءارى قاراي شىڭداۋدى باستادىق! اللا بەرەكەلى ەتسىن!، - دەپ جازدى بوكسشى.

جانىبەك باددي ماكگيرتپەن دە جاقسى قارىم-قاتىناستا بولاتىنىن، ارادا ەشقانداي تۇسىنىسپەۋشىلىك بولعان جوق دەپ مالىمدەدى.

بۇعان دەيىن قازاقستاندىق بوكسشى گەرمانيادان شىققان IBF چەمپيونى ۆينچەنتسو گۋالتەريمەن (21-0-1، 7 ك و) جۇدىرىقتاساتىنى حابارلانعان بولاتىن.