پريگوجين مىنگەن ۇشاقتاعى جولسەرىكتىڭ قازاقستانعا قانداي قاتىسى بولعان؟
اۋە كولىگى فەدەرالدىق اگەنتتىگى مالىمەتىنشە، جولاۋشىلار تىزىمىندە «ۆاگنەر» جەكە اسكەري كومپانياسىنىڭ نەگىزىن قالاۋشى ەۆگەني پريگوجين بولعان. كەيىن بۇل دەرەك راستالدى. سونداي-اق، ۇشاقتا بولعاندار ءتىزىمى جاريالاندى. ولاردىڭ قاتارىندا جولسەرىك كريستينا راسپوپوۆا دا بولعان، - دەپ حابارلايدى Massaget.kz ءتىلشىسى.
رەسەيلىك بۇقارالىق اقپارات قۇرالدارىنا سۇيەنسەك، كريستينا راسپوپوۆا - رەسەيدىڭ چەليابينسك وبلىسى ەمانجەلينسك قالاسى پروكۋرورىنىڭ ورىنباسارى ەۆگەني راسپوپوۆتىڭ اپكەسى. ەكەۋى دە قازاقستاندا دۇنيەگە كەلگەن. ءبىر كەزدەرى ەكەۋى دە رەسەيگە كوشكەن.
ال Lenta.ru مالىمەتىنشە، 39 جاستاعى كريستينا راسپوپوۆا (كەيبىر دەرەكتەردە يادريەۆسكايا - ەسك.) ماسكەۋدەن سانكت-پەتەربۋرگكە اپاتقا ۇشىراعان ۇشاققا يەلىك ەتەتىن «م ن ت اەرو» بيزنەس تاسىمالداۋمەن اينالىساتىن كومپانياعا جۇمىسقا تۇرعان كەزىندە كوشكەن. بىرنەشە كۇن بۇرىن ستيۋاردەسسا «ماڭىزدى مارشرۋتتا» جۇمىس ىستەۋ ءۇشىن ماسكەۋگە قايتا اۋىستىرىلىپتى. سوڭعى رەيسىنىڭ الدىندا ول الەۋمەتتىك جەلىلەردە شەرەمەتيەۆوداعى كافەنىڭ سۋرەتىن جاريالاپ، تۋىستارىنا قوڭىراۋ شالعان.
سونداي-اق، اشىق دەرەككوزدەردە ۇشار كۇنى كريستينا رەيس كەشىگىپ جاتقانىنا شاعىمدانعانى ايتىلادى. ول ۇشۋعا دايىن ەكەنىن كورسەتەتىن سۋرەتتى دە جاريالاعان ەكەن.
ەسكە سالايىق، بۇعان دەيىن رەسەيدىڭ تۆەر وبلىسىندا اپاتقا ۇشىراعان ۇشاقتا ەۆگەني پريگوجين دە بولۋى مۇمكىن ەكەنى حابارلاندى.
كەيىنىرەك پريگوجيننىڭ ۇشاعى قۇلاعان جەردەن سەگىز ادامنىڭ ءمايىتى تابىلدى.
رەسەي پرەزيدەنتى ۆلاديمير پۋتين «ۆاگنەر» جەكە اسكەري كومپانياسىنىڭ نەگىزىن قالاۋشى ەۆگەني پريگوجيننىڭ قازا تاپقانىن راستاپ، كوڭىل ايتتى. ال زەلەنسكي اپاتقا ۇشىراعان پريگوجيننىڭ ۇشاعى تۋرالى، بۇعان وزدەرىنىڭ قاتىسى جوعىن ايتتى.
