اقتاۋدا اتتراكتسيون توقتاپ، بالالار تومەن سالبىراعان كۇيى قالىپ قويدى

None
استانا. قازاقپارات - اقتاۋدا Rixos قوناق ءۇيىنىڭ اۋماعىندا ورنالاسقان اتتراكتسيون جوعارى كوتەرىلىپ توقتاپ قالعان. ونىڭ ىشىندە بالالار بولدى، دەپ حابارلايدى قازاقپارات ءتىلشىسى.

ايتا كەتەيىك، بۇگىن الەۋمەتتىك جەلىلەردە اقتاۋدا اتتراكتسيون توقتاپ، وعان مىنگەن بالالاردىڭ باسى تومەن سالبىرعان كۇيى قالىپ قويعانى كورسەتىلگەن ۆيدەو تارادى.

«كەشە پوليتسياعا اقتاۋ قالاسىنداعى ويىن-ساۋىق ساياباعىندا اتتراكتسيوننىڭ توقتاپ قالعانى بويىنشا قوڭىراۋ ءتۇستى. وقيعا ورنىنا يۋۆەنالدى پوليتسيا قىزمەتكەرلەرى باردى. ول جەرگە بارعان ماماندار جارىقتىڭ بولماعانىنان اتتراكتسيوننىڭ توقتاعانىن كوردى. بۇل وقيعاعا بايلانىستى اتتراكتسيون يەسىمەن پروفيلاكتيكالىق اڭگىمە جۇرگىزىلدى. اقتاۋدا جارىقتى ءسوندىرۋ ماسەلەلەرى بولىپ جاتقانىن وزدەرىڭىز دە كورىپ جاتقان شىعارسىزدار»، - دەپ ءتىلشى ساۋالىنا جاۋاپ بەردى ماڭعىستاۋ وبلىستىق پوليتسيا دەپارتامەنتىنەن.

ال، قالالىق اكىمدىكتىڭ باسپا ءسوز قىزمەتىنەن مالىمدەگەندەي، بۇل اتتراكتسيوندار Rixos قوناق ءۇيىنىڭ مەنشىگىندەگى اۋماقتا ورنالاسقان. تيىسىنشە، جەرگىلىكتى قۇزىرلى ورگان وقيعاعا قاتىستى تۇسىنىك بەرۋگە قۇقىلى ەمەس ەكەنىن جەتكىزدى.

مۇنىمەن قاتار، ماڭعىستاۋ وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتىنە دە حابارلاسىپ كوردىك. اتالعان ۆەدومستۆو بۇل وقيعا بويىنشا قوڭىراۋ تۇسپەگەنىن العا تارتتى.

سوڭعى جاڭالىقتار