ارسەلورميتتال تەمىرتاۋدىڭ باسپا ءسوز حاتشىسى جاڭا باسشىلىقتىڭ قىسىم كورسەتىپ جاتقانىن ايتتى

استانا. قازاقپارات - «ارسەلورميتتال تەمىرتاۋ» ا ق كومىر دەپارتامەنتى باسپا ءسوز قىزمەتىنىڭ جەتەكشىسى جاننا تۇرابايەۆا وزىنە قاتىستى جاڭا باسشىلىق تاراپىنان قىسىم كورسەتىلىپ، جۇمىستان شىعارۋعا يتەرمەلەۋ ارەكەتتەرى ءجۇرىپ جاتقانىن ءمالىم ەتتى.

جاننا تۇرابايەۆا ءوزىنىڭ Facebook الەۋمەتتىك جەلىسىندەگى پاراقشاسىندا جۇمىس پروتسەسىندە بەتپە- بەت كەلىپ جاتقان قيىندىقتاردى ءتىزىپ جازعان. ونىڭ مالىمەتىنە ساي، جاننا تۇرابايەۆا ءىس- شارالاردى ۇيىمداستىرۋ بويىنشا قىزمەت كورسەتۋشىمەن ىنتىماقتاستىق ورناتۋدان باس تارتقان. ارتىنشا وعان باسشىلىق تاراپىنان قىسىم كورەسىتىلگەن.

«باسشىلىق مەنىڭ ءبولىمىمنىڭ قارجىلىق اۋديتىنە تەكسەرۋ جۇرگىزۋ باستاماسىن كوتەردى. جاقسى، ءبىراق مەنىڭ مىناداي ۇسىنىسىم بار - تەكسەرۋ جۇرگىزىلەتىن بولسا، وندا ول باس PR بولىمگە دە جۇرگىزىلسىن. اتاپ ايتقاندا، تەمىرتاۋداعى قىسقى فەستيۆالدى 3 ەسە ارزان وتكىزۋگە بولادى. وسى قىزمەتتى كورسەتۋشى كىم دەيسىز بە؟ سونداي- اق، تەمىرتاۋداعى كومبينات عيماراتىنىڭ ماڭىنا ورناتىلعان شىرشا بار. ونىڭ قۇنى دا نارىقتىق باعادان 3 ەسە جوعارى. جاريا ەتپەۋ جانە كوممەرتسيالىق قۇپيا تۋرالى كەلىسىمشارتقا سايكەس، سومانى ايتا المايمىن. ماعان سەنسەڭىز، قازىر اقىسىز دەمالىسقا جىبەرىلگەن كوپتەگەن قاراپايىم ەڭبەك ادامدارى قانشا قاراجاتتىڭ بوسقا جۇمسالعانىن بىلسە، رەنجۋى مۇمكىن»، - دەپ جازدى جاننا تۇرابايەۆا.

ول قازاقپارات ءتىلشىسىنىڭ ساۋالىنا جاۋاپ بەرە وتىرىپ، بۇگىندە ەڭبەك ينسپەكتسياسى مەن قاراعاندى وبلىستىق پروكۋراتۋراسىنا ارىز جازعانىن ايتتى. قازىر تەكسەرىس ءجۇرىپ جاتىر.

قازاقپارات رەداكسياسى «ارسەلورميتتال تەمىرتاۋ» ا ق- نا رەسمي ساۋال جولدادى.