جايلى مەكتەپ: باستاۋىش پەن جوعارى سىنىپ وقۋشىلارى بولەك عيماراتتا وقيدى

None
استانا. قازاقپارات - «جايلى مەكتەپ» جوباسى اياسىندا مەكتەپتەر اۋىلدا دا، قالادا دا ءبىرىڭعاي ستاندارتپەن سالىنادى.

بۇل تۋرالى وقۋ- اعارتۋ مينيسترلىگى قارجى جانە بيۋدجەتتىك جوسپارلاۋ دەپارتامەنتىنىڭ ديرەكتورى عالىمجان مولداش ايتتى، دەپ حابارلايدى قازاقپارات ءتىلشىسى

«ۇلتتىق جوبا اياسىندا سالىناتىن مەكتەپتەر بۇرىن سالىنعان مەكتەپتەردەن ەدەۋىر ەرەكشەلەنەدى. اتاپ ايتقاندا، جايلى مەكتەپتەر اۋىلدا دا، قالادا دا ءبىرىڭعاي ستاندارتپەن سالىنىپ، پاندىك كابينەتتەرمەن جانە زەرتحانالارمەن تولىق جابدىقتالادى. 1-4-سىنىپ وقۋشىلارى جانە 5-11-سىنىپ وقۋشىلارى ءۇشىن عيماراتتار بولەك بلوكتاردان تۇرادى. مەكتەپتىڭ سپورت زالدارى 1-4-سىنىپ جانە 5-11-سىنىپ وقۋشىلارى ءۇشىن بولەك ورنالاسادى. ولار وقۋشىلاردىڭ سانىنا ساي ەسەپتەلەدى. ءاربىر مەكتەپتە قىزدار مەن ۇلداردى ەڭبەككە باۋلۋعا ارنالعان ارنايى شەبەرحانالار، ستۋديالار قاراستىرىلادى. وسى جانە باسقا دا وزگەشەلىكتەر بالالارىمىزدىڭ تاعدىرى مەن قۇزىرەتتىلىگىن جان- جاقتى دامىتۋعا باعىتتالعان»، - دەدى ول ءبىلىم سالاسى قىزمەتكەرلەرىنىڭ رەسپۋبليكالىق تامىز كەڭەسىندە.

ونىڭ اتاپ وتۋىنشە، قالالاردا جانە بەلسىندى دامىپ كەلە جاتقان پەرسپەكتيۆكاسى بار ەلدى مەكەندەردە جوبالىق قۋاتى 300 دەن 2500 گە دەيىن 369 مەكتەپتى سالۋ ارقىلى 740 مىڭ جاڭا وقۋشى ورنىن قۇرۋ جوسپارلانىپ وتىر.

«وقۋ-اعارتۋ مينيسترلىگى «جايلى مەكتەپ» ۇلتتىق جوباسىن ىسكە اسىرۋعا قاجەت بارلىق نورماتيۆتىك بازانى ازىرلەپ، قولدانىسقا ەنگىزدى. بۇل رەتتە مەكتەپ سالۋ كەزىندە تۋىندايتىن كوپتەگەن پروبلەما ۇلتتىق جوبادا ەسكەرىلدى»، - دەدى عالىمجان مولداش.


سوڭعى جاڭالىقتار