ءبىرىنشى سىنىپ وقۋشىلارىنىڭ اتا-انالارى نە ءبىلۋ كەرەك؟

استانا. قازاقپارات - مەكتەپتەگى العاشقى جىل - بالا ءۇشىن دە، ونىڭ اتا-اناسى ءۇشىن دە ماڭىزدى كەزەڭ.

ۇيقىدان ەرتە تۇرۋ، سىنىپتاستارىمەن ارالاسۋ جانە ءۇي تاپسىرمالارىن ورىنداۋ بالادا كۇيزەلىس تۋدىرۋى مۇمكىن. وعان جاڭا ورتاعا بەيىمدەلۋگە قالاي كومەكتەسۋگە بولادى؟ پسيحولوگ داريا ۆالەنتوۆا كەڭەستەر بەردى، - دەپ حابارلايدى Tengri Life.

ماڭىزدى نارسەلەردى بالامەن بىرگە تالقىلاڭىز

«بالا ءبىلۋى كەرەك بازالىق ۇسىنىستار بار: ونىڭ اتى- ءجونى، تەگى، جاسى، اتا-اناسىنىڭ ەسىمدەرى مەن بايلانىس نومىرلەرى. بالا ونى مەكتەپتەن كىم الىپ كەتە الاتىنىن جانە كىم الىپ كەتە المايتىنىن ءبىلۋى كەرەك»، - دەيدى مامان.

ۇجىمدا ءوزىن ۇستاۋ ەرەجەلەرىن ءتۇسىندىرىڭىز

مەكتەپ - بالانىڭ قۇرداستارىمەن رەسمي سويلەسۋدەگى العاشقى تاجىريبەسى. ادەتتە، بۇل كەزگە دەيىن بالادا دوستارى بولادى، ءبىراق سوندا دا كەيدە سىنىپتاستارمەن دوستاسىپ كەتۋى قيىن بولادى.

داريا ۇجىمدا ءوزىن ۇستاۋ ەرەجەسىن ءتۇسىندىرۋ ءۇشىن وتباسىداعى قۇندىلىقتاردى پايدالانۋعا بولاتىنىن ايتتى.

«مىسالى: ءبىز ءبىر-ءبىرىمىزدى قۇرمەتتەيمىز جانە كەلىسپەۋشىلىك كەزىندە جەكە تۇلعاسىنا وتپەيمىز. ادام جايلى ەمەس، سەزىمدەر مەن ارەكەت جايلى ايتامىز. ءوزىمىزدىڭ جانە باسقانىڭ جەكە شەكاراسىن قۇرمەتتەيمىز. ەگەر بىردەڭە ۇناماسا، «جوق» دەپ ناقتى ايتامىز. باسقانىڭ دا باس تارتۋىن قۇرمەتتەيمىز. باسقانىڭ زاتىن رۇقساتسىز الۋعا بولمايدى»، - دەيدى داريا.

پسيحولوگ بالاعا كومەك سۇراۋ جانە سۇراق قويۋ قالىپتى ەكەنىن تۇسىندىرۋگە كەڭەس بەردى.

«ەگەر شۇعىل بولسا، ونىڭ ءسوزىن بولگەنىڭ ءۇشىن كەشىرىم سۇرا دا، ءوتىنىشىڭدى ايت. مۇنداي سوزدەر بالانىڭ ۇجىمدا ۇيالماۋىنا كومەكتەسەدى»، - دەيدى مامان.

ءۇي تاپسىرماسىن ورىنداۋدى ۇيىمداستىرىڭىز

بالا ساباقتى جىلاماي ورىنداۋ ءۇشىن جونگە سالىنعان جۇيە كومەكتەسەدى. مامان بىلاي دەيدى:

«ءۇي تاپسىرماسىن كۇندە ءبىر ۋاقىتتا ورىنداعان ءجون. بالا شارشاپ قالماس ءۇشىن قيىننان باستاپ جەڭىلگە وتەمىز».

داريا بالانىڭ ەرەكشەلىگى مەن تەمپەرامەنتىنە قاراي ساباقتى وقۋ ءتۇرىن تاڭداۋعا كەڭەس بەردى.

«ءبىرى ساباقتى ءۇزىلىسسىز وقي الادى، ال باسقاسى از-ازدان وقىعاندى جاقسى كورەدى: 20 مينۋت - ساباق، 5-7 مينۋت - دەمالۋ»، - دەيدى پسيحولوگ.

ۇيقى رەجيمىن ساقتاڭىز

بالانىڭ ۇيقىسى قانسا عانا تاڭەرتەڭ ەرتە جاقسى ويانادى. سونداي- اق كۇن ءتارتىبىن دەمالىس كۇندەرى دە ساقتاۋ كەرەك.

«بالانى ۇيىقتاتۋعا اسا ءمان بەرىڭىز: ماسساج، بىرگە قاسىنا جاتا تۇرۋ، قىزىقتى وقيعا ايتىپ بەرۋ، ءسۇيۋ»، - دەپ كەڭەس بەردى ول.

بالانى تاۋەلسىز بولۋعا ۇيرەتىڭىز

بالا اتا- اناسى ءۇشىن ءارقاشان بالا بولىپ قالادى. ءبىراق ونىڭ تاۋەلسىز بولۋدى ۇيرەنۋى - ونىڭ دامۋىنداعى ماڭىزدى كەزەڭ. پسيحولوگ بالاعا سەنۋگە كەڭەس بەردى. ەگەر بالا ءبىر نارسەنى جاساي المايمىن دەسە، سول بويدا ءوزىڭىز جاساپ بەرمەي، «كەل، بىرگە ىستەيىك، مەن ساعان ۇيرەتەمىن» دەپ ايتىڭىز.