مەكتەپكە بارا جاتقان: پاكىستاندا ارقانجولدا قالىپ قويعان ادامدار قۇتقارىلدى - ۆيدەو
بۇعان دەيىن جازعانىمىزداي، 8 ادام، ونىڭ ىشىندە 6 بالا مەن 2 ەرەسەك مەكتەپكە بەت العان. حايبەر- پاحتۋنحۆا پروۆينتسياسىنىڭ شالعايداعى جانە تاۋلى اۋداندارىندا تۇراتىن كوپ بالا مەكتەپكە ارقانجولمەن بارادى. تروستاردىڭ ءبىرى ءۇزىلىپ كەتىپ، ادامدار 274 مەتر بيىكتىكتە قالىپ قويعان.
جەرگىلىكتى ب ا ق-تىڭ مالىمەتىنشە، قۇتقارۋشىلار جەتكەنشە جولاۋشىلار فۋنيكۋلەردا كەم دەگەندە ءتورت ساعات وتىرعان.
ارقانجولداعى اقاۋ سەيسەنبى كۇنى، جەرگىلىكتى ۋاقىتپەن تاڭعى ساعات 07.00 شاماسىندا حايبەر- پاحتۋنحۆا پروۆينسياسىنىڭ اللاي القابىندا بولدى.
اللاي - تەڭىز دەڭگەيىنەن 2 مىڭ مەتر بيىكتىكتەگى تاۋلى اۋدان. مۇندا ەلدى مەكەندەر ءبىر-بىرىنەن الشاق ورنالاسقان. پاكىستاننىڭ سولتۇستىگىندەگى اتالعان تاۋلى اۋماقتا كولىك ينفراقۇرىلىمى جوق، جولدار جوقتىن قاسى. كوپتەگەن اۋداندار ءبىر تاۋدان ەكىنشىسىنە جەتۋ ءۇشىن ارقانجول سىندى تاسىمالداعىشتاردى پايدالانادى.
جەرگىلىكتى مۇعالىم پاكىستاننىڭ Dawn باسىلىمىنا ءمالىم ەتكەندەي، وسىنداي تاسىلمەن كۇندەلىكتى مەكتەپكە 150 بالا قاتىنايدى. سەبەبى اۋداندا باسقا كولىك جوق.
ارقانجولدا قالىپ قويعان وقۋشىلار تۇراتىن القاپتان مەكتەپكە دەيىنگى اراقاشىقتىق جاياۋ ەكى ساعاتتى قۇرايدى. سوندىقتان جەرگىلىكتى تۇرعىنداردىڭ ءبىرى - مەحانيك ارقانجول تارتۋدى شەشكەن. ونىمەن تاۋعا ءتورت مينۋتتا جەتۋگە بولادى. پوليتسيا مالىمەتىنشە، مەحانيك بۇل قۇرىلىسقا ءوڭىر بيلىگىنەن رۇقسات العان. 22-تامىز كۇنى تاڭەرتەڭ ارقانجول مەكتەپكە دەيىن ءتورت رەيس جاساعان. بەسىنشىسىندە تروستارى ءۇزىلىپ كەتكەن.
