مال ازىعىن دايىندايتىن تەحنيكا الۋ ءۇشىن بولىنەتىن نەسيە سوماسى ۇلعايدى

استانا. قازاقپارات - مال ازىعىن دايىنداۋ مەن سۋارۋ جۇيەلەرىنە ارنالعان تەحنيكا الۋ ءۇشىن «قازاگروقارجى» كومپانياسىنىڭ جارعىلىق كاپيتالىن ۇلعايتۋ ءۇشىن 20 ميلليارد تەڭگە ءبولىندى. بۇل تۋرالى ۇكىمەت وتىرىسىندا پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«ەگىندى ۋاقىتىندا جانە ساپالى جيناپ الۋ - ەلىمىزدىڭ ازىق-تۇلىك قاۋىپسىزدىگىن قامتاماسىز ەتۋ جونىندەگى باسىم مىندەتتەردىڭ ءبىرى. ءبىرقاتار وڭىرلەردە ەگىن وراعى باستالىپ كەتتى. ۇكىمەت تاراپىنان قارجىلىق جانە ماتەريالدىق-تەحنيكالىق قامتاماسىز ەتۋ بويىنشا بارلىق قاجەتتى شارالار قابىلداندى. نارىقتىق باعادان 15 پايىزعا تومەن باعامەن 426 مىڭ توننا ديزەل وتىنى ءبولىندى. 140 ميلليارد تەڭگە بيۋدجەتتىك كرەديت بەرۋ كوزدەلگەن. سونداي-اق، جاڭا استىقتى فورۆاردتىق ساتىپ الۋعا 81 ميلليارد تەڭگە ءبولىندى. بيىل مال ازىعىن دايىنداۋعا ارنالعان تەحنيكا مەن سۋارۋ جۇيەلەرىن ساتىپ الۋ ءۇشىن «قازاگروقارجى» كومپانياسىنىڭ جارعىلىق كاپيتالىن ۇلعايتۋعا 20 ميلليارد تەڭگە ءبولىندى»، - دەدى ۇكىمەت باسشىسى ءاليحان سمايىلوۆ.