پرەمەر-مينيستر ىشكى كومىر نارىعىن تەكسەرۋدى تاپسىردى
بۇل تۋرالى ۇكىمەت وتىرىسىندا الداعى جىلۋ بەرۋ ماۋسىمىنا دايىندىق ماسەلەسىن تالقىلاۋ كەزىندە پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«جالپى، جىلىتۋ ماۋسىمىنا دايىندىق جانە ونى وتكىزۋ بارىسى - كۇندەلىكتى ماڭىزدى ماسەلە. سوندىقتان، ءاربىر وڭىردە جول كارتاسىن ازىرلەپ، بەكىتۋ قاجەت. وندا جىلۋ جەلىلەرىن دامىتۋدى، جاڭا جىلۋ ورتالىقتارىن سالۋ مەن قولدانىستاعى ورتالىقتاردى كۇردەلى جوندەۋ جۇمىستارىن ناقتى ايقىنداۋ كەرەك. سونداي-اق، اۆاريالار بولعان جاعدايدا وڭىرلىك كوممۋنالدىق قىزمەتتەر مەن جىلۋ ورتالىقتارىنىڭ ءىس- قيمىلىنىڭ ءار قادامى جازىلعان الگوريتم بەكىتىلۋى ءتيىس»، - دەدى ءا. سمايىلوۆ ۇكىمەت وتىرىسىندا.
ونىڭ ايتۋىنشا، وسى سەكتورداعى تسيفرلاندىرۋ مەن اۆتوماتتاندىرۋ دەڭگەيىن ارتتىرۋ ماڭىزدى.
«جىلۋ جەلىسى ينفراقۇرىلىمىنىڭ جاي-كۇيى، شىعىن دەڭگەيى، تۇتىناتىن جىلۋ ەنەرگياسىنىڭ قۋاتى مەن ساپاسى تۋرالى وبەكتيۆتى دەرەكتەر قاجەت. بۇل جىلۋ جۇيەسىن باسقارۋعا جانە جىلۋ بەرەتىن وبەكتىلەردەگى اۆاريالار سانىن ازايتۋعا مۇمكىندىك بەرەدى»، - دەدى پرەمەر-مينيستر.
ۇكىمەت باسشىسى ءوڭىر اكىمدىكتەرى بەلگىلەنگەن مەرزىمدە بارلىق جوسپارلانعان جوندەۋ جۇمىستارىنىڭ اياقتالۋىن جانە قاجەت كولەمدە وتىننىڭ الدىن الا جەتكىزىلۋىن قامتاماسىز ەتۋى قاجەت ەكەنىن تاپسىردى.
«ىشكى كومىر نارىعىندا دۇربەلەڭگە جول بەرمەۋ ءۇشىن ءوڭىر اكىمدىكتەرى ءتيىستى تارتىپپەن 2 اپتا مەرزىمدە كومىردى دايىنداۋ جانە وتكىزۋ پۋنكتتەرىنىڭ جاعدايىنا، ونىڭ ساپاسىنا، جەتكىزۋ كەستەلەرىنە، باعا دەڭگەيىنە تەكسەرۋ جۇرگىزۋى قاجەت. يندۋستريا مينيسترلىگى «قازاقستان تەمىر جولىمەن» بىرلەسىپ، كومىر جەتكىزۋ ءۇشىن ۆاگونداردىڭ قاجەتتى سانىن قامتاماسىز ەتۋى ءتيىس. وڭىرلەردە جەتكىزىلگەن وتىن ءۇشىن كاسىپورىنداردىڭ، سونداي- اق كوممۋنالدىق قىزمەتتەر ءۇشىن تۇتىنۋشىلاردىڭ دەبيتورلىق بەرەشەگىن وتەۋ جۇمىستارىن كۇشەيتۋ كەرەك»، - دەدى پرەمەر-مينيستر.
