قاراعاندى وبلىسىنداعى شاحتادا بەسىنشى كەنشىنى ىزدەستىرۋ قالاي ءجۇرىپ جاتىر

استانا. قازاقپارات - «قازاقستان» شاحتاسىندا جەرگىلىكتى ءورت وشاقتارىن ءسوندىرۋ توقتاتىلىپ، بەسىنشى كەنشىنى ىزدەستىرۋ جۇمىستارى كۇشەيتىلدى، دەپ حابارلايدى قازاقپارات توتەنشە جاعدايلار مينيسترلىگىنىڭ باسپا ءسوز قىزمەتىنە سىلتەمە جاساپ.

ءمالىم ەتىلگەندەي، توتەنشە جاعدايلار ءمينيسترى سىرىم ءشارىپحانوۆ «قازاقستان» شاحتاسىندا ىزدەستىرۋ-قۇتقارۋ جۇمىستارىنىڭ بارىسىن تۇراقتى باقىلاۋدا ۇستاپ وتىر.

ساعات 18:14 تە ءىز-ءتۇزسىز بولعان ءتورتىنشى ادام تابىلدى. ول تاۋ-كەن قۇتقارۋ ۆزۆودى كومانديرىنىڭ ورىنباسارى سامات شوشيموۆ باسشىلىق ەتەتىن ەكى بولىمشەنىڭ كۇشىمەن تابىلدى. «كاسىبي اسكەريلەندىرىلگەن اۆاريالىق-قۇتقارۋ قىزمەتى» رەسپۋبليكالىق ورتالىق شتابىنىڭ بولىمشەلەرى 5- كەنشىنىڭ بولجامدى ورنالاسۋى باعىتىندا د-6 كونۆەيەرلىك بەتكەيىندە جوعارىدان تومەن قاراي ىزدەستىرۋدى جالعاستىرىپ جاتىر. ىزدەستىرۋ جۇمىستارى اپاتتى ۋچاسكەنىڭ تولىق ءتۇنىم باسۋىمەن، جوعارى تەمپەراتۋرامەن (65 گرادۋس) جانە ۇيىندىلەر تۇرىندەگى كەدەرگىلەرمەن قيىنداۋدا. جوعارىدان تومەن قاراي 170 مەتر ءجۇرىپ ءوتىلدى. جەرگىلىكتى ءورت وشاقتارىن ءسوندىرۋ جۇمىستارى توقتاتىلدى، بارلىق كۇش- جىگەر ىزدەستىرۋگە باعىتتالعان، - دەلىنگەن ت ج م حابارلاماسىندا.

ەسكە سالايىق، قاراعاندى وبلىسىنداعى «قازاقستان» شاحتاسىندا ءورت 17- تامىز كۇنى ساعات 10:05 تە تۇتاندى.

اپات كەزىندە جەر استىندا 227 كەنشى بولدى. 222 ادامدى جەر بەتىنە جەدەل كوتەرۋ مۇمكىن بولدى، سەگىزى زارداپ شەكتى.

5 جۇمىسشىنىڭ تاعدىرى بەلگىسىز بولدى. 3 ادامنىڭ دەنەسى تابىلىپ، اتى-ءجونى جاريالانعان ەدى. بۇگىن، 19- تامىزدا ءتورتىنشى جۇمىسشىنىڭ دەنەسى تابىلدى.

18- تامىزداعى جاعداي بويىنشا مەديتسينا مەكەمەلەرىندە ورتتەن زارداپ شەككەن 11 كەنشى ەم قابىلداپ جاتتى.

ەڭبەك جانە حالىقتى الەۋمەتتىك قورعاۋ مينيسترلىگى ەڭبەك جانە الەۋمەتتىك قورعاۋ كوميتەتىنىڭ ءتوراعاسى تولەگەن وسپانقۇلوۆ ءمالىم ەتكەندەي، «قازاقستان» شاحتاسىنداعى اپات ءۇشىن جاۋاپتى تۇلعا 7 جىلعا دەيىن تۇرمەگە قامالۋى مۇمكىن.

پرەزيدەنت قاسىم-جومارت توقايەۆ ءورت سەبەبىن انىقتاۋ ءۇشىن جان-جاقتى تەرگەۋ جۇرگىزۋدى تاپسىردى.