ەرمەك مارجىقپايەۆ قوسشى قالاسى مەن سەلينوگراد اۋدانىنداعى مەكتەپتەردىڭ وقۋ جىلىنا دايىندىعىن تەكسەردى

None
استانا. قازاقپارات - اقمولا وبلىسىنىڭ اكىمى ەرمەك مارجىقپايەۆ قوسشى قالاسى مەن سەلينوگراد اۋدانىنداعى مەكتەپتەردىڭ جاڭا وقۋ جىلىنا دايىندىعىن تەكسەردى، دەپ حابارلايدى وبلىس اكىمىنىڭ باسپا ءسوز قىزمەتى.

سەلينوگراد اۋدانى قابانباي باتىر اۋىلىندا جالپى ءبىلىم بەرەتىن مەكتەپتە كۇردەلى جوندەۋ جۇرگىزىلۋدە، وندا 1200 گە جۋىق وقۋشى وقيدى. ەكى جىلدىق جوبا «اۋىل-ەل بەسىگى» باعدارلاماسى اياسىندا قارجىلاندىرىلادى.

ءوڭىر باسشىسى جۇمىس قارقىنىن جەدەلدەتۋدى، جۇمىسشىلار سانىن كوبەيتۋدى، اينالانى اباتتاندىرۋدى، مەكتەپ جانىنداعى ساياباقتاعى اعاشتاردى رەتكە كەلتىرۋدى، كىرمە جولداردى اسفالتتاۋدى تاپسىردى.

ەل پرەزيدەنتىنىڭ تاپسىرماسى اياسىندا وسى ەلدى مەكەندە 1200 ورىندىق «جايلى مەكتەپتىڭ» قۇرىلىسى جۇرگىزىلۋدە. جوبا ەكى جىلعا ەسەپتەلگەن. باس جوسپار ازىرلەندى. جۇمىسشىلار قۇرىلىس-مونتاجداۋ جۇمىستارىنا كىرىستى.

«ءبىزدىڭ مىندەتىمىز - ساپالى نىسان سالۋ، ال مەكتەپ قىزمەتكەرلەرى قولايلى جيھاز بەن جابدىقتى وزدەرى تاڭداۋى كەرەك»، - دەدى «Samruk-Kazyna Construction» ا ق مەردىگەر كومپانياسىنىڭ وكىلدەرى.

وبلىس باسشىسى جاڭا وقۋ ورنى ءۇشىن بىلىكتى پەداگوگ كادرلاردىڭ ماڭىزدىلىعىن اتاپ ءوتتى.

«بۇل ۇلتتىق جوبا. ماڭىزدىسى - كادرلىق ماسەلە: مۇنداي مەكتەپتەردە ءبىلىم ساپاسى دا سايكەس بولۋى كەرەك. پرەزيدەنت قاسىم-جومارت توقايەۆ اتاپ وتكەندەي، وقىتۋ ادىستەمەسى دۇرىس، ال وقۋشىلارعا دەگەن كوزقاراس جەكە بولۋى كەرەك»، - دەپ اتاپ ءوتتى ەرمەك مارجىقپايەۆ.

ۇلتتىق جوبا اياسىندا بيىل بارلىعى 9 مەكتەپتىڭ قۇرىلىسى باستالادى. بارلىق جەردە مەردىگەرلەر انىقتالىپ، جۇمىستار باستالدى.

جاقىندا وقۋشى ورىندارىنىڭ تاپشىلىعى قاتتى سەزىلگەن قوسشى قالاسىندا ءۇش مەكتەپ سالىنۋدا. ولاردىڭ 2700 ورىندىق ەكەۋىن وسى جىلدىڭ سوڭىندا اياقتاۋ جوسپارلانۋدا. ءۇشىنشىسى-1500 ورىندىق مەكتەپ-گيمنازيا، 1- قىركۇيەكتە قالانىڭ جاس تۇرعىندارىن قابىلدايدى. وسىلايشا، وبلىستا مەكتەپ-گيمنازيانىڭ اشىلۋىمەن ءۇش اۋىسىمدى ءبىلىم بەرۋ ماسەلەسى شەشىلەدى. جەكە ينۆەستيتسيالاردىڭ 7,5 ميلليارد تەڭگەسىنە سالىنعان مەكتەپ بەتتى تانۋ كوزدەلگەن قاۋىپسىزدىك جۇيەسىمەن جابدىقتالعان. بارلىق 54 كابينەتتەر قاجەتتى جابدىقتارمەن، سونىڭ ىشىندە سمارت-ماركەرلى تاقتالارمەن جابدىقتالعان، سونداي-اق ءوزىنىڭ كينوتەاترى، فوتوستۋدياسى، سيفرلىق كىتاپحاناسى، ەكى سپورت زالى، اكت زالى جانە فۋتبول الاڭى بار.

«ەڭ باستىسى، مۇندا، ەڭ الدىمەن، قوسشىدان كەلگەن بالالار وقىدى. قازىر بۇل اقمولا وبلىسىنداعى ەڭ ۇزدىك گيمنازيا ەكەنىن ءتۇسىنۋ كەرەك. مۇندا ءتيىستى وقۋشىلاردى ىرىكتەۋ، وقىتۋ ادىستەمەسىنە كوزقاراستار، ءبىلىم ساپاسى بولۋى كەرەك. بۇل وقۋ ورنىنىڭ مارتەبەسى جەمىستى وقۋعا، ءوزىن-ءوزى تاربيەلەۋگە مىندەتتەيدى. بالالاردىڭ عىلىممەن اينالىسۋى قاجەت»، - دەپ اتاپ ءوتتى ەرمەك مارجىقپايەۆ وقۋ ورنىنىڭ باسشىلىعىنا سويلەگەن سوزىندە.

ساپاردى قورىتىندىلاي كەلە، وبلىس اكىمى ءبىلىم باسقارماسىنا، سەلينوگراد اۋدانى مەن قوسشى قالاسى اكىمدىگىنە جاڭا وقۋ جىلىنا قويىلعان بارلىق مىندەتتەردى اياقتاۋدى تاپسىردى.

سوڭعى جاڭالىقتار