قازاقستان شاحتاسىنداعى ءورت: بەس كەنشى ءالى تابىلعان جوق

استانا. قازاقپارات - «قازاقستان» شاحتاسىندا جەر استىنان حابارسىز كەتكەن كەنشىلەر ءالى تابىلعان جوق، ىزدەۋ جۇمىستارى جالعاسۋدا.

بۇل باعىتتاعى جۇمىستارعا قويۋ ءتۇتىن كەدەرگى كەلتىرۋدە. بۇل تۋرالى ارسەلور ميتتال تەمىرتاۋ تاۋ-كەن سەگمەنتى اتقارۋشى ديرەكتورىنىڭ ورىنباسارى سەرگەي وگاي ءمالىم ەتتى، دەپ حابارلايدى قازاقپارات ءتىلشىسى.

«ساعات 16:40 جاعداي بويىنشا 5 جۇمىسشى ىزدەستىرىلىپ جاتىر. ىزدەۋ جۇمىستارىمەن ديسپوزيتسيا بويىنشا شاحتادا ورنالاسقان 12 بولىمشەنىڭ 5 ءۋى اينالىسادى. جۇمىسشىلاردى ىزدەۋگە تاۋ-كەن ورنىنداعى قالىڭ ءتۇتىن كەدەرگى كەلتىرىپ وتىر. قوسىمشا اقپارات تاعى بەرەمىز»، - دەدى سەرگەي وگاي ۆيدەو تۇسىنىكتەمەدە.

ايتا كەتەيىك، بۇعان دەيىن قاراعاندى وبلىسىندا شاحتا ورتەنىپ، 227 ادام ەۆاكۋاتسيالانعانى تۋرالى حابارلاعان ەدىك.

شاحتادادا 227 ادام بولعان. شاحتادان قاپتال ۇڭعىما ارقىلى ادامدار جوعارى شىعارىلعان.

كەيىن ءورت كەزىندە 5 كەنشىنىڭ ءىز-ءتۇسسىز قالعانى جانە 4 ادام اۋرۋحاناعا جەتكىزىلگەنى ايتىلدى.

الدىن الا مالىمەتكە سايكەس، ءقاۋىپسىز جەرگە شىعارىلعان 13 ادام باس اۋرۋى مەن جوتەلگە شاعىمدانعان. قازىرگى ۋاقىتتا 4 ادام، ونىڭ ىشىندە ەكەۋى شاحتينسك قالاسىنىڭ ورتالىق اۋرۋحاناسىنا، تاعى ەكەۋى وبلىستىق مەديتسينالىق ورتالىققا جاتقىزىلدى.

وقيعا ورنىندا قاراعاندى وبلىسى اكىمىنىڭ ءبىرىنشى ورىنباسارى ۆاديم باسين مەن شاحتينسك قالاسىنىڭ اكىمى مۇرات قىدىرعانبەكوۆ ءجۇر.