سارايشىق قالاشىعىنىڭ ورنىنان قازاق-نوعاي كەزەڭىندەگى مونشا تابىلدى
«سارايشىق» مۋزەي-قورىعىنىڭ باس ينسپەكتورى، ارحەولوگ ايبەك تۇرار ۇلىنىڭ ايتۋىنشا، بۇل - تاريحي قالاشىقتىڭ ورنىنان تابىلعان ەكىنشى مونشا.
«سارايشىق قالاشىعىنىڭ ورنىنان تابىلىپ جاتقان ولجا كوپ. ماسەلەن، 2005 -جىلى جايىق وزەنىنىڭ جارقاباعىنان مونشانىڭ جارتى بولىگى ساقتالعان ورنى تابىلدى. ال، جاقىندا ەكىنشى مونشانى تاۋىپ وتىرمىز. ەكى مونشانىڭ ءبىر-بىرىنە ۇقساستىعى بار. بۇل - حالىققا ارنالعان قوعامدىق ماقساتتاعى ەمەس، تۇرعىنداردىڭ ءوز وتباسىنا ارناپ سالعان جەكە مەنشىكتەگى مونشا»، - دەيدى ايبەك تۇرار ۇلى.
ارحەولوگتىڭ ايتۋىنا قاراعاندا، التىن وردانىڭ گۇلدەنگەن داۋىرىندە قوعامدىق مونشالار كەڭ تاراعان. كەيىنەن بىرنەشە بولىككە ىدىراعان كەزدە قوعامدىق مونشالار قىزمەتى توقتاپ قالعان.
«سول سەبەپتەن، ءار اۋقاتتى وتباسى وسىنداي شاعىن مونشانى سالعان بولار دەپ ويلايمىز. بيىل تابىلعان مونشانى نوعاي- قازاق كەزەڭىنە سايكەس كەلەدى دەپ ەسەپتەيمىز»، - دەپ ءتۇسىندىردى ايبەك تۇرار ۇلى.
ونىڭ دەرەگىنە قاراعاندا، مونشا ءۇش بولىكتەن تۇرادى. كيىم شەشەتىن، جۋىناتىن بولمەلەر، پەش ورناتىلعان بولىگى بار.
«كيىم شەشەتىن بولمەنىڭ ەدەنىنە قىش كىرپىشتەر توسەلىپ، اق الەباستردان سىلاق جاعىلعان. جۋىناتىن بولمەنىڭ ەدەنىندە دە قىش كىرپىشتەر بولعان. كىرپىشتەردىڭ جيەگىن اق الەباستر ەرىتىندىسىمەن بەكىتكەن. ال، ەدەننىڭ شەتىنەن قابىرعاعا تىگىنەن ورنالاسقان قىش كىرپىشتەر قالانعان. ەدەن ورتاسىندا سۋاعار سالىنعان. سۋاعار شۇڭقىرىنىڭ قابىرعاسىنا قىش كىرپىشتەر ورىلگەن. كيىم شەشەتىن بولمەنىڭ باتىس جاعىندا، جۋىناتىن بولمەنىڭ سولتۇستىك جاعىندا پەش ورنى انىقتالدى»، - دەيدى ارحەولوگ.
ەسكە سالا كەتەلىك، بۇعان دەيىن سارايشىقتا وتەتىن ۇلتتىق قۇرىلتايدا قاسىم حان ەسكەرتكىشى اشىلاتىنىن جازعان بولاتىنبىز.
