ادامدار ينتەرنەت-الاياقتارعا نەگە الدانىپ قالا بەرەدى؟
«كاسپەرسكي زەرتحاناسىنىڭ» قازاقستان، ورتالىق ازيا جانە موڭعولياداعى باسقارۋشى ديرەكتورى ۆالەري زۋبانوۆ ماسساگەتكە ادامداردىڭ الاياقتارعا الدانۋى، الاياقتار قولداناتىن تاسىلدەر تۋرالى ايتىپ بەردى.
ۆالەري زۋبانوۆتىڭ سوزىنشە، ونلاين-الاياقتىق راسىندا كوبەيىپ كەلە جاتىر.
«الاياقتاردىڭ ارباۋىنا بالالار ءجيى ءتۇسىپ جاتادى. سەبەبى ولار سەنگىش كەلەدى. ءبىز جۇرگىزگەن ساۋالناماعا سايكەس، بالالار الاياقتارعا الدانىپ، فيشينگ سايتتارىنا تاپ بولعاندىقتان ءاربىر ونىنشى اتا-انا اقشاسىنان ايىرىلعان»، - دەيدى ۆالەري زۋبانوۆ.
سونىمەن قاتار، زۋبانوۆ ينتەرنەت-الاياقتار قانداي ايلا-تاسىلدەر قولداناتىنىن ءتۇسىندىرىپ بەردى.
«الاياقتار الەۋمەتتىك ينجەنەريا ءتاسىلىن كوپ قولدانادى. مىسالى قۇربان تەز شەشىم قابىلداۋى ءۇشىن اسىقتىرىپ جىبەرۋى مۇمكىن. ولار قۇرباننىڭ ءالسىز جەرىن پايدالانىپ، قورقىتىپ، قوقان-لوقى كورسەتىپ، ەموتسيونالدى رەاكسياسىن تۋدىرادى»، - دەيدى ول.
ادامدار نە ءۇشىن الاياقتارعا الدانىپ قالا بەرەدى؟
«الاياقتار تەحنولوگيالار دامىعان سايىن»ونەرتاپقىش«بولىپ كەتكەن. ولار ادامداردىڭ ويىنا كىرىپ- شىقپايتىن الداۋدىڭ جاڭا جۇيەسىن ويلاپ تاۋىپ جاتادى. كەيبىر جاعدايلاردا الاياقتاردىڭ رەسۋرسى دا ساپالى بولىپ كەتكەن: ولار ويلاپ تاباتىن اڭىز نەمەسە ديزاين جانە تاعى باسقاسى»، - دەيدى ۆالەري زۋبانوۆ.
سونىمەن قاتار، زەرتحانا باسشىسى الاياقتار كەيىنگى كەزدە كوپ قولدانىپ جۇرگەن RustDesk قوسىمشاسى تۋرالى ءتۇسىندىرىپ بەردى.
«ادامدار تۋرالى مالىمەتتى جيناپ الۋ ءۇشىن قاجەت الىستان باسقارىلاتىن زاڭدى باعدارلامالاردى قولدانىپ الداۋ - بۇرىننان كەلە جاتقان ءتاسىل. الاياقتار ادامدارعا اسەر ەتەتىن ءتۇرلى وقيعا ويلاپ تاۋىپ جاتادى. قۇربانعا بەلگىلى ءبىر قوسىمشانى جۇكتەپ الدىرىپ، سول ارقىلى ادامنىڭ ءتۇرلى سەرۆيستەگى مالىمەتتەرىن ۇرلاپ الادى. سوندىقتان ساق بولىپ، تەلەفون ارقىلى نە ونلاين الاتىن ءار اقپاراتتى تەكسەرىپ الۋ كەرەك» - دەپ ءتۇسىندىردى زەرتحانا باسشىسى.
الاياقتارعا الدانىپ قالماۋدىڭ جولى قانداي؟
ۆالەري زۋبانوۆ ينتەرنەت-الاياقتارعا الدانىپ قالماۋدىڭ بىرنەشە جولىن ايتتى.
«كۇماندى حابارلامالاردان سىلتەمەلەرگە وتپەڭىز جانە كۇدىكتى حاتتاردى اشپاڭىز، ورناتىلعان باعدارلامالار مەن وپەراتيۆتى جۇيەنى ۇنەمى جاڭارتىپ وتىرىڭىز. بارلىق قۇرىلعىدا قورعانىس ورناتىپ قويىڭىز. مۇمكىن بولسا ەكى فاكتورلى اۋتەنتيفيكاتسيانى ورناتىڭىز»، - دەپ ءتۇسىندىردى زۋبانوۆ.
