قايرات نۇرتاستىڭ اكەسى پرەزيدەنتكە ۇندەۋ جاسادى
نۇرتاس ايداربەكوۆتىڭ سوزىنشە، ول ۇشۋى كەرەك بولعان رەيس ابدەن كەشىگىپ، ءبىراق ۇشقان.
«قۇرمەتتى ءبىزدىڭ ەلىمىزدىڭ پرەزيدەنتى قاسىم-جومارت كەمەل ۇلى توقايەۆ مىرزاعا. مەنىڭ سىزگە قوياتىن ساۋالىم: ەلىمىزدەگى اۋەكومپانيالار ءبىزدىڭ ەلدىڭ زاڭىنا باعىناتىن كومپانيالار ما؟ الدە وزدەرى ەشكىمگە تاۋەلسىز، ەشكىمنىڭ الدىندا جاۋاپ بەرمەيتىن كومپانيالار ما؟ وسى جايلى بىلگىم كەلەدى.
بۇل ساۋالدى قويۋ سەبەبىم: مەن قازاقستان ازاماتى بولعاندىقتان جانە ءوزىمنىڭ شارۋالارىما بايلانىستى ۇشاقتا كوپ جۇرەتىنىم راس، بۇل ءبىرىنشى رەت بولىپ تۇرعان جوق. مىسالى، بۇگىن بولعان جايتتى ايتار بولسام، 11-ىنە قاراعان ءتۇنى 01.50-دە استانا قالاسىنان الماتىعا ۇشاتىن ۇشاق تاڭعى 5-تەن اسقاندا ارەڭ ۇشتى. ءبىر كىسى كەلىپ، «وسىنداي جاعداي بولىپ جاتىر، كەشىرىڭىزدەر، تەحنيكالىق اقاۋ بولىپ جاتىر» دەپ ەسكەرتپەي، جاي عانا «بىرنەشە ۋاقىتقا كەشىكتى» دەپ تاڭعى 5 كە دەيىن اۋەجايدا وتىردىق. بۇل قالاي؟ ول كىسىلەردىڭ شارۋاسى ءجۇرىپ جاتىر. ال ءبىز، قارا حالىق، ءبىز دە كەشىكتىك، ءبىزدىڭ دە شارۋامىز بار. مىسالى، مەن استانادان الماتىعا كەلىپ، ودان ءارى تاعى ءجۇرۋىم كەرەك بولاتىن. وسىعان جاۋاپ بەرەتىن ادام بار ما؟ الدە ءسىزدىڭ تاپسىرمالارىڭىزدى، قويعان تالاپتارىڭىزدى مۇلدە تىڭدامايتىن بولعانى ما؟»، - دەيدى نۇرتاس ايداربەكوۆ.
ەسكە سالايىق، بيىل 16-قاڭتاردا قازاقستاندىق اۋەكومپانياعا جولاۋشى اش قالعانى ءۇشىن ايىپپۇل سالىنعان بولاتىن. بۇل وقيعا بىلتىر بولعان، الايدا سوت ءىستى جاقىندا عانا قاراپتى.
Qazaq Air اۋەكومپانياسىنىڭ اقتوبەدەن استاناعا باعىتتالعان رەيسى 4 ساعات 40 مينۋتقا كەشىككەن. بۇل رەيستەگى جولاۋشىلاردىڭ ءبىرى اۋەكومپانيادان تاماق پەن سۋسىن سۇراعان، ءبىراق كومپانيا ونىڭ تالابىن ورىنداماعان. كەيىن جولاۋشى مەملەكەتتىك ورگانعا شاعىم ءتۇسىرىپتى.
ناتيجەسىندە Qazaq Air اۋەكومپانياسىنا تاسىمالداۋشىنىڭ كىناسىنەن رەيس توقتاتىلعان نەمەسە كەشىكتىرىلگەن كەزدە جولاۋشىعا قىزمەت كورسەتۋ جونىندەگى مىندەتتەردى ورىنداماۋ دەرەگى بويىنشا اكىمشىلىك ءىس قوزعالدى. اۋەكومپانيا وكىلى ءىستى توقتاتۋدى سۇراپ، دالەلدەر كەلتىردى.
كومپانيا وكىلدەرى كۇندىزگى ۋاقىتتا رەيستىڭ كەشىكتىرىلەتىنىن الدىن الا حابارلاپ، تاماق پەن سۋسىن بەرىلەتىنى تۋرالى حابارلاندىرۋ جاساعان. الايدا بۇل جولاۋشى ءتۇن ورتاسىندا، ساعات 00:40-تا، اۋەجايداعى كافە جابىلىپ قالعاندا تاماق سۇراعان. اۋەكومپانيانىڭ مالىمەتىنشە، بۇل ۋاقىتتا تاماق الۋعا مۇمكىندىك بولماعان.
