قىتايدا بالالار ورگاندارىن ساتاتىن قىلمىسكەرلەر توبى انىقتالدى - فەيك

استانا. قازاقپارات - الەۋمەتتىك جەلىلەردە ەكى بولىكتەن تۇراتىن ۆيدەوروليك تاراپ جاتىر. بىرىنشىسىندە جەردە جاتقان بىرنەشە ادامدى بىرەۋلەر تەپكىنىڭ استىنا الۋدا، ەكىنشىسىندە مۇز سالىنعان كونتەينەردە بالانىڭ دەنەسى جاتىر.

جازىلعانداي، ۇستالعان ەر ادامدار - بالالار ورگاندارىن ساتاتىن باندانىڭ مۇشەلەرى، كونتەينەردەگى بالا - ساتۋ ماقساتىندا دايىندالعان دەنەلەردىڭ ءبىرى. Stopfake.kz ۆيدەونىڭ انىق-قانىعىن انىقتاپ كوردى، دەپ حابارلايدى قازاقپارات.

انىقتالعانداي، بۇل 2018 -جىلدان بەرى ءارتۇرلى سيپاتتامامەن ينتەرنەتتە تاراپ كەلە جاتقان ەسكى ۆيدەولار.

«ۆيدەونىڭ ەكى بولىگىن دە تولىق قاراستىرايىق. بىرىنشىسىندە جەردە كيىممەن جاتقان ەكى ادام كورسەتىلگەن. ولاردى باسقا ادامدار تەپكىلەپ جاتىر. ولاردىڭ كىم ەكەندىگى جانە ولاردى ناقتى نە ءۇشىن ۇرىپ جاتقانى بەلگىسىز. JawaPos.com يندونەزيالىق جاڭالىقتار پورتالىنىڭ حابارلاۋىنشا، روليكتىڭ كەيىپكەرلەرى الاياقتىق پەن ساپاسىز تاۋاردى ساتقانى ءۇشىن وسىنداي جازاعا تارتىلعان.

بالانىڭ دەنەسىنىڭ جانىندا جىلاپ وتىرعان ايەلدىڭ ۆيدەوسى ينتەرنەتتە كەڭىرەك تارالعان. ونى العاش رەت 2017 -جىلدىڭ شىلدەسىندە قىتايلىق قولدانۋشى جاريالاعان. شىن مانىندە، بۇل بالا تۋىستارىنا قوناققا بارىپ، سۋعا باتىپ كەتكەن. ونىڭ دەنەسىن جەرلەۋ ءۇشىن تۋعان قالاسىنا جەتكىزۋ ماقساتىندا مۇز سالىنعان كونتەينەرگە سالعان»، - دەپ جازادى Stopfake.kz.

سونداي-اق ورگانداردى ترانسپلانتاتسيالاۋ كۇردەلى جانە مۇقيات رەتتەلەتىن پروتسەسس ەكەنىن ەسكەرگەن ءجون. دەنەسى مۇزداتىلعان قايتىس بولعان دونوردان مۇشەنى ترانسپلانتاتسيالاۋ مۇمكىن ەمەس.

وسىلايشا، تارالعان روليكتە ورگاندارعا ساتۋ ماقساتىندا بالالاردى ۇرلاۋ ارەكەتى كورسەتىلمەگەن. بۇل ءبىر-بىرىمەن بايلانىستى ەمەس ەكى ءتۇرلى ۆيدەو: ءبىرىنشىسى الاياقتاردى جازالاۋ، ەكىنشىسى سۋعا باتىپ كەتكەن بالانىڭ دەنەسىن تاسىمالداۋ تۋرالى ەكەنىن بىلگەنىمىز ءجون.