ەنەرگەتيكا مينيسترلىگى قازاقستان نەلىكتەن رەسەيدەن جانارماي الىپ جاتقانىن ءتۇسىندىردى

«ىشكى نارىقتا جانار-جاعارماي ماتەريالدارىنىڭ قاجەت كولەمىن ەسەپتەي كەلە، مۇناي ونىمدەرىنىڭ جەكەلەگەن تۇرلەرى رەسەيدەن يمپورتتالادى. بيتۋمعا قاتىستى توقتالساق، 2023-جىلعى 19- شىلدەدە ق ر مەن رەسەي فەدەراتسياسى اراسىنداعى كەلىسىم اياسىندا ر ف- تەن جىلىنا 300 مىڭ تونناعا دەيىن بيتۋم جەتكىزۋدى قاراستىراتىن حاتتاماعا قول قويىلدى»، - دەلىنگەن مينيسترلىكتىڭ «قازاقپارات» اگەنتتىگىنىڭ رەسمي ساۋالىنا بەرگەن جاۋابىندا.
جاۋاپتا ايتىلعانداي، اي-95 بەنزينىنە باعا سۇرانىس پەن ۇسىنىس نەگىزىندە رەتتەلەدى.
«جازعى دەمالىس كەزەڭىنىڭ ەرەكشەلىگىن جانە وسى كەزدەگى اي-95 بەنزينىنە سۇرانىستىڭ ارتۋىن ەسكەرە وتىرىپ، ءىرى جانارماي قۇيۋ ستانتسيالارى جەلىلەرى يمپورت جاساۋى مۇمكىن ەكەنىن مينيسترلىك تۇسىندىرگەن ەدى. بۇل تۇرعىدا رەسەي فەدەراتسياسىنىڭ ەنەرگەتيكا مينيسترلىگىمەن ينديكاتيۆتىك تەڭگەرىم ەسكەرىلگەن. سونىمەن قاتار، اي-95 باعاسىن مەملەكەت رەتتەمەيدى. سوندىقتان جانارماي قۇيۋ بەكەتتەرىندەگى باعالار مەن ساتىپ الۋ كولەمى نارىقتاعى سۇرانىس پەن ۇسىنىسقا بايلانىستى وزگەرۋى مۇمكىن»، - دەپ اتالىپ وتكەن مينيسترلىك اقپاراتىندا.
بۇدان بولەك، ەنەرگەتيكا مينيسترلىگى بۇعان دەيىن ءورت قاۋپى مەن يمپورتتىڭ كوپ بولۋىنا بايلانىستى بيىلدىڭ 14- ماۋسىمى مەن 14- شىلدەسى ارالىعىندا (نارىقتاعى جاعداي تۇراقتانعانعا دەيىن) رەسەيلىك اۆياكەروسيندى تەمىرجول كولىگىمەن اكەلۋگە ءتيىستى شەكتەۋ ەنگىزىلگەنىن ەسكە سالدى.
«قازىرگى كەزدە اۆياوتىن نارىعىنداعى جاعداي تۇراقتاندى. جوعارىدا ايتىلعاندارعا بايلانىستى، سونداي- اق اۋەجايلاردان تۇسكەن وتىنىشتەردى ەسكەرە وتىرىپ، مينيسترلىك رەسەيلىك اۆياكەروسيننىڭ يمپورتىنا كونۆەنتسيالىق تىيىم سالۋ مەرزىمىن ۇزارتۋ تۋرالى باستاما كوتەرمەدى»، - دەلىنگەن ۆەدومستۆو جاۋابىندا.
بۇدان بۇرىن حابارلانعانداي، ەنەرگەتيكا مينيسترلىگى رەسەي فەدەراتسياسىنان اۆياكەروسين يمپورتىنا نەلىكتەن تىيىم سالىنعانىن ءتۇسىندىردى.