قازا تاپقان ورمانشىلاردىڭ وتباسى مۇشەلەرى تولەماقى الىپ وتىرادى

استانا. قازاقپارات - ورمان كۇزەتى قىزمەتكەرى قىزمەتتىك مىندەتىن ورىنداۋ بارىسىندا قازا تاپقان جاعدايدا، ونىڭ وتباسىنىڭ ءاربىر مۇشەسىنە اقشالاي تولەم بەرىلىپ تۇراتىن بولادى.

اشىق ن ق ا پورتالىندا ۇكىمەت باسشىسىنىڭ ءتيىستى قاۋلى-جوباسى جاريالاندى، دەپ حابارلايدى قازاقپارات ءتىلشىسى.

قوسا بەرىلىپ وتىرعان قىزمەتتىك مىندەتتەرىن (مەملەكەتتىك ورمان قورىن كۇزەتۋ جانە قورعاۋ قىزمەت مىندەتتەرىن) اتقارۋ كەزىندە مەرتىگۋى (جاراقاتتانۋى، جارالانۋى، كونتۋزيا الۋى) سالدارىنان قازا تاپقان (قايتىس بولعان) مەملەكەتتىك ورمان كۇزەتۋ قىزمەتكەرىنىڭ وتباسى مۇشەلەرىنە اقشالاي تولەمدى جۇزەگە اسىرۋ قاعيدالارى مەن مولشەرى بەكىتىلسىن، - دەلىنگەن قۇجاتتا.

قۇجاتقا سايكەس، اقشالاي تولەم قىزمەتتىك مىندەتتەرىن اتقارۋ كوز جۇمعان قىزمەتكەردىڭ وتباسى مۇشەلەرىنە جۇرگىزىلەدى.

قىزمەتكەردىڭ وتباسى مۇشەلەرىنە جۇبايى (زايىبى)؛ كامەلەتكە تولعانعا دەيىن نەمەسە جالپى ورتا، تەحنيكالىق جانە كاسىپتىك، ورتا بىلىمنەن كەيىنگى ءبىلىم بەرۋ جۇيەسىندە، جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ جۇيەسىندە كۇندىزگى وقۋ ورنىن بىتىرگەنگە دەيىن 23 جاستان اسپايتىن بالالارى، ونىڭ ىشىندە اسىراپ العان بالالارى، بىرگە تۇراتىن وگەي ۇلدارى مەن وگەي قىزدارى جاتادى.

اقشالاي تولەم وتباسىنىڭ ءاربىر مۇشەسىنە قازا تاپقان ورمانشىنىڭ سوڭعى اتقارعان لاۋازىمى بويىنشا اقشالاي قاراجاتىنىڭ 40 پايىزى مولشەرىندە بەرىلەدى.

بۇل رەتتە وتباسىنىڭ بارلىق مۇشەسىنە تولەنەتىن اقشالاي تولەمدەردىڭ ەڭ جوعارى مولشەرى اقشالاي قاراجاتتىڭ 100 پايىزىنان اسپاۋعا ءتيىس.

وتباسى مۇشەلەرى ۇشەۋ جانە ودان كوپ بولعان كەزدە ءارقايسىسىنا اقشالاي تولەمدەردىڭ مولشەرى اقشالاي قاراجاتتىڭ ءجۇز پايىزىنا تەڭ ۇلەس رەتىندە ەسەپتەلەدى.

اقشالاي تولەمدەرمەن قامتاماسىز ەتىلەتىن وتباسى مۇشەلەرىنىڭ سانى وزگەرگەن كەزدە اقشالاي تولەمدەردىڭ مولشەرى ونى الۋعا قۇقىعى بار وتباسى مۇشەلەرىنىڭ سانىنا قاراي تيىسىنشە ۇلعايتىلادى نەمەسە ازايتىلادى.

قۇجات 28- تامىزعا دەيىن قوعامدىق تالقىلاۋعا شىعارىلىپ وتىر.