ەلوردادا قاي سپورت تۇرلەرى تانىمال
بۇل تۋرالى قالالىق دەنە شىنىقتىرۋ جانە سپورت باسقارماسىنىڭ باسشىسى سامات جىلقىبايەۆ ايتتى، دەپ حابارلايدى قازاقپارات ءتىلشىسى.
«استانا تۇرعىندارىنىڭ 37,26 پايىزى دەنە شىنىقتىرۋمەن جانە سپورتپەن ۇنەمى اينالىسادى. جىل باسىنان 311 بۇقارالىق سپورت شاراسى وتكىزىلىپ، وعان قالانىڭ 26 مىڭ تۇرعىنى مەن قوناعى قاتىستى. سپورتپەن شۇعىلداناتىن ازاماتتاردى قامتۋدى ۇلعايتۋ ماقساتىندا بۇقارالىق سپورتتى دامىتۋ باسىمدىعىن ەسكەرە وتىرىپ، ارنايى باعدارلامالار مەن جوبالار ازىرلەندى. وسى باعدارلامالار اياسىندا ەلوردادا فۋتبول، ستريتبولدان اۋلا ليگالارى ۇيىمداستىرىلدى»، - دەدى باسقارمانىڭ باسشىسى.
ايتۋىنشا، قالادا كوماندالىق سپورت تۇرلەرى كەڭىنەن تانىمال.
«وسى ورايدا تۇرعىندار باسكەتبول، ۆولەيبول، فۋتبول، شايبالى حوككەي سياقتى ويىندارعا كوپ بارادى. سونىمەن قاتار قازىر جۇگىرۋ، دزيۋدو، بوكس، ءجۇزۋ جانە ۆەلوسپورتقا ادامدار ەرەكشە ءمان بەرىپ وتىر. قىسقى وليمپيادالىق سپورت تۇرلەرىندە شايبالى حوككەيمەن اينالىساتىن كونتينگەنت باسقا سپورت تۇرلەرىنە قاراعاندا باسىم»، - دەدى باسقارما باسشىسى.
سونىمەن بىرگە شورت- ترەك، شاڭعى جارىسى، كونكيمەن جۇگىرۋ سياقتى سپورت تۇرلەرىنە سۇرانىس بار.
«بۇعان دامىعان سپورت قۇرىلىمدارى ىقپال ەتىپ جاتىر. قالادا وليمپيادالىق سپورت تۇرلەرىمەن اينالىساتىنداردىڭ جالپى سانى 142725 ادامدى قۇرادى. كاراتە، دجيۋ-دجيتسۋ، شاحمات جانە پانكراتيون دا وليمپيادالىق ەمەس سپورت تۇرلەرىنىڭ اراسىندا تانىمال بولىپ قالا بەرەدى. وليمپيادالىق ەمەس سپورت تۇرلەرىمەن جالپى 341103 ادام اينالىسىپ ءجۇر. ەڭ تانىمال ۇلتتىق سپورت ءتۇرى - توعىزقۇمالاق. قالادا ۇلتتىق سپورت تۇرىمەن 11128 ادام اينالىسىپ جاتىر»، - دەدى سامات جىلقىبايەۆ.
بۇدان بۇرىن حابارلانعانداي، استانا سپورتشىلارى جىل باسىنان 4 مىڭنان استام مەدال جەڭىپ العان.
سونداي-اق سامات جىلقىبايەۆ جىل سايىن تامىزدىڭ ءۇشىنشى جەكسەنبىسىندە اتالىپ وتەتىن سپورت كۇنىنە وراي استانادا قانداي شارالار ۇيىمداستىرىلاتىنىن ايتتى.
