ەلىمىزدە كىتاپحاناشى-پەداگوگ مامانى پايدا بولادى

استانا. قازاقپارات - كىتاپحاناشى ماماندىعىندا وقيتىندار جاڭا سالانى يگەرىپ شىعادى، دەپ حابارلايدى قازاقپارات ءتىلشىسى.

«كىتاپحاناشىلاردىڭ جالاقىسىن وسىرۋمەن قاتار اتالعان ماماندىققا جاڭا مازمۇن بەرۋ كەرەك دەپ ويلايمىز. كىتاپحاناشى تەك كىتاپ قورىن تۇگەندەپ، ونى وقىرمانعا تاۋىپ بەرەتىن عانا ەمەس، جان-جاقتى بولۋى كەرەك. مىسالى، كىتاپ ىزدەپ كەلگەن بالالار مەن جاستارعا باعىت باعدار بەرە الۋى ءتيىس. سونىمەن قاتار IT مامانداردى دا كىتاپحانا سالاسىنا تارتۋ ماڭىزدى»، - دەدى ءماجىلىس دەپۋتاتى جۇلدىز سۇلەيمەنوۆا «AMANAT» پارتياسى الاڭىندا وتكەن باسپا ءسوز ءماسليحاتىندا.

حالىق قالاۋلىسىنىڭ ايتۋىنشا، وتاندىق كىتاپحانا سالاسى مەملەكەتتىك قولداۋ مەن ىلگەرىلەتۋدى قاجەت ەتەدى.

«ەلىمىزدە الداعى ۋاقىتتا كىتاپحاناشى ماماندىعىنا تاپشىلىق تۋىندايتىنىن ەسكەرە وتىرىپ، ءبىز گرانتتى %30 عا ارتتىرۋدى سۇرادىق. بۇل ماسەلە بيىلعى وقۋ جىلىندا شەشىلدى. تالداۋ ناتيجەسى كورسەتكەدەي، الداعى 3 جىلدا 6200 كىتاپحاناشى تاپشى بولماق. كەلەسى ماسەلە - كىتاپحاناشى- پەداگوگ نەمەسە پەداگوگ- كىتاپحاناشى دەگەن ماماندىق اشۋ. بۇعان قاتىستى مينيسترلىكتەن قاراستىرىپ جاتىرمىز دەگەن جاۋاپ كەلدى»، - دەيدى دەپۋتات.

سونداي-اق بريفينگتە كىتاپحاناشى ماماندىعىنا بولىنەتىن مەملەكەتتىك گرانتتاردىڭ تولىق يگەرىلمەي قالاتىنى ايتىلدى.

«بۇگىندە ەلىمىزدە 120 جوعارى وقۋ ورنى بار. ونىڭ ىشىندە 14 ى - اسكەري جانە ارنايى وقۋ ورىندارى. كىتاپحاناشى- پەداگوگ ماماندىعى بويىنشا رەەستردەن وتكىزدىك. اتالعان جاڭاشىلدىقتى بيىلدان باستاپ جۇزەگە اسىرايىن دەپ وتارمىز. كىتاپحاناشى ماماندىعىنا بيىل باكالاۆرياتقا 100 گرانت، ال ماگيستراتۋراعا 20 جانە دوكتورانتۋراعا 3 گرانت ءبولىندى»، - دەدى عىلىم جانە جوعارى ءبىلىم مينيسترلىگى جوعارى بىلىممەن كەيىنگى ءبىلىم كوميتەتى ءتوراعاسىنىڭ ورىنباسارى بانىم ناربەكوۆا.